ଗଜପତି (ସମୃଦ୍ଧ ଓଡିଶା) ଗଜପତି ଜିଲ୍ଲା ଅଡବା ଥାନା ଅନ୍ତର୍ଗତ ବିରିକୋଟ ଗ୍ରାମରେ ଗୋଟିଏ ଅଭାବନୀୟ ଘଟଣା ଘଟିଛି । ଘରର ଭୂତଳ ସୁଡ଼ଙ୍ଗ ଭିତରକୁ ଯାଇ ୩ ଭାଇଙ୍କର ମୃତ୍ୟୁ ହୋଇଛି । ସାନ ଭାଇକୁ ବଞ୍ଚେଇବାକୁ ଯାଇ ଆଉ ଦୁଇ ଭାଇ ମୃତ୍ୟୁବରଣ କରିଛନ୍ତି । ମୃତ୍ୟୁବରଣ କରିଥିବା ତିନି ଭାଇଙ୍କ ନାମ ବିକ୍ରମ ମାଝୀ, ସଞ୍ଜୀବ ମାଝୀ ଓ ଜିତୁ ମାଝୀ । ଗତକାଲି ରାତିରେ ଘର ଭିତରେ ଥିବା ଭୂତଳ ସୁଡ଼ଙ୍ଗ ଭିତରକୁ ତାଙ୍କ ବାପା ଏଟିମ୍ କାର୍ଡ ଆଣିବାକୁ ସଞ୍ଜୀବକୁ କହିଥିଲେ । ସଞ୍ଜୀବ ଯାଇଥିଲା କିନ୍ତୁ ସେ ନ ଆସିବାରୁ ବିକ୍ରମ, ସଞ୍ଜୀବକୁ ଡାକିବାକୁ ଯାଇଥିଲା କିନ୍ତୁ ସେ ଅଚେତ୍ ଅବସ୍ଥାରେ ପଡ଼ି ରହିଥିବାର ଦେଖିଥିଲା ତାହା ପାଖକୁ ଯାଇ କଣ ହେଇଛି ପଚାରିଲା ସମୟରେ ବିକ୍ରମ ବି ଅଚେତ୍ ହୋଇ ପଡ଼ି ଯାଇଥିଲା । ଦୁଇ ଭାଇ ଅଚେତ୍ ଅବସ୍ଥାରେ ପଡ଼ି ରହିଥିବା ଦେଖି ଜିତୁ ବଞ୍ଚେଇବା ପାଇଁ ଯାଇଥିଲା କିନ୍ତୁ ସେ ବି ଅଚେତ୍ ହୋଇ ପଡ଼ି ଯାଇଥିଲା । ତାଙ୍କ ପରିବାର ଲୋକେ ତିନି ଭାଇଙ୍କୁ ଉଦ୍ଧାର କରି ଗୁରୁତର ଅବସ୍ଥାରେ ପ୍ରଥମେ ବିରିକୋଟ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ । ସେଠାରେ ଡାକ୍ତର ସେମାନଙ୍କ ଅବସ୍ଥା ସଙ୍କଟାପନ୍ନ ଦେଖି ମୋହନା ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ରକୁ ପଠାଇଥିଲା । ପରେ ସେଠାରେ ତିନି ଭାଇଙ୍କୁ ଡାକ୍ତର ମୃତ ଘୋଷଣା କରିଥିଲେ । ହେଲେ ତିନି ଭାଇଙ୍କ ଶ୍ୱାସ ରୁଦ୍ଧ ହୋଇ ମୃତ ହୋଇଥିବା ସନ୍ଦେହ କରାଯାଉଛି । ଅଡବା ପୋଲିସ ମୃତ ଦେହକୁ ଉଦ୍ଧାର କରିବା ସହ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ଜଣାପଡିଛି ।
ରିପୋର୍ଟ : ଆଦିତ୍ୟ ପ୍ରସାଦ ପଟ୍ଟନାୟକ