ଛତ୍ରପୁର (ସମୃଦ୍ଧ ଓଡିଶା) ସାଧାରଣ ନିର୍ବାଚନ ଯେତେ ପାଖେଇ ଆସୁଛି ପ୍ରଚାର ମଧ୍ୟ ସେତିକି ଜୋରଜାର ହେଉଛି । ବିଭିନ୍ନ ଦେଳର ପ୍ରାର୍ଥୀମାନେ ସିନେମା ଷ୍ଟାରମାନଙ୍କୁ ନେଇ ପ୍ରଚାର କରି ଲୋକଙ୍କ ମନକୁ ଜିତି ଭୋଟ ହାତେଇବାକୁ ଚେଷ୍ଟା କରିଚାଲିଥିବା ଦେଖିବାକୁ ମିଳୁଛି । ଗତକାଲି ବିଜେଡିର ଛତ୍ରପୁର ବିଧାନସଭା ପ୍ରାର୍ଥୀ ସୁବାସ ଚନ୍ଦ୍ର ବେହେରା ଓ ବ୍ରହ୍ମପୁର ଲୋକସଭା ପ୍ରାର୍ଥୀ ଚନ୍ଦ୍ରଶେଖର ସାହୁଙ୍କ ନିମନ୍ତେ ସିନେ ଅଭିନେତ୍ରୀ ତମନା ନିର୍ବାଚନ ମଣ୍ଡଳୀର ଛତ୍ରପୁର ବ୍ଲକର ପୋଟ୍ଟଲାମପୁର ପଞ୍ଚାୟତ, ବଡମାଧପୁର ପଞ୍ଚାୟତ, ଗଂଜାମ ବ୍ଲକର କରପଡା ପଞ୍ଚାୟତ, ରାଜପୁର ପଞ୍ଚାୟତରେ ରୋଡ ସୋ ମାଧ୍ୟମରେ ଶଙ୍ଖ ଚିହ୍ନରେ ଭୋଟ ଦେଇ ବିଜୟୀ କରିବା ନିମନ୍ତେ ଜନସାଧାରଣଙ୍କୁ ଅନୁରୋଧ କରିଥିଲେ । ଏହି ରୋଡ ସୋରେ ଛତ୍ରପୁର ବିଧାନସଭା ପ୍ରାର୍ଥୀ ସୁବାସ ଚନ୍ଦ୍ର ବେହେରା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସୁଶାସନ ଏବଂ ଜନମଙ୍ଗଳ କାର୍ଯ୍ୟ ଗୁଡ଼ିକୁ ନେଇ ଲୋକଙ୍କୁ ସଚେତନା କରାଇବା ସହ ଶଙ୍ଖ ଚହ୍ନରେ ସୁଇଚ୍ ଟିପି ବିପୁଳ ପରିମାଣରେ ଭୋଟ ଦେବା ନିମନ୍ତେ ଅନୁରୋଧ କରିଥିଲେ । ଖାସ୍ କରି ଗଞ୍ଜାମ ଜିଲ୍ଲାର ସଦର ମହକୁମା ଛତ୍ରପୁର ନିର୍ବାଚନ ମଣ୍ଡଳୀରେ ପୁଣି ଥରେ ବିଜୁ ଜନତା ଦଳର ବିଧାୟକ ପଦବୀ ହାତେଇବା ନିମନ୍ତେ ନିର୍ବାଚନ ମଣ୍ଡଳୀ ନେତା ଓ କର୍ମୀମାନେ ଆଗ୍ରହ ସହ ଘର ଘର ବୁଲି ଦଳୀୟ ଲୋକସଭା ଓ ବିଧାନସଭା ପ୍ରାର୍ଥୀଙ୍କୁ ବିଜୟୀ କରିବା ନିମନ୍ତେ ଲାଗିପଡିଥିବା ଦେଖିବାକୁ ମିଳିଛି ।
ରିପୋର୍ଟ : ଜିଲ୍ଲା ସ୍ୱତନ୍ତ୍ର ପ୍ରତିନିଧି ନିମାଇଁ ଚରଣ ପଣ୍ଡା
