ଜଳେଶ୍ୱର (ସମୃଦ୍ଧ ଓଡିଶା) ଆଜି ଅପରାହ୍ନରେ ଭେଲୋରା ଅଂଚଳର ଗରିପୁର ଗାଁରୁ ଏକ ଟାଟା ମ୍ୟାଜିକ୍ରେ ପ୍ରାୟ ୧୪ଜଣ ଆଦିବାସୀ ଜଳେଶ୍ୱର ଥାନା ଅନ୍ତର୍ଗତ ଛମୌଜ ଗାଁକୁ ଏକ ବିବାହ ଭୋଜିରେ ଯୋଗ ଦେବାପାଇଁ ଆସୁଥିଲେ । ୬୦ନଂ ଜାତୀୟ ରାଜପଥର ଜଳେଶ୍ୱର- ପଶ୍ଚିମବାର୍ଡ ରାସ୍ତା ସଠିକ୍ଭାବେ ଜାଣିନପାରି ପଶ୍ଚିମବଂଗ ଅଭିମୁଖେ ଭୁଲକ୍ରମେ ଯାଇଥିଲେ । ପରେ ହସ୍ପିଟାଲ ବାଇପାସ୍ଠାରେ ସେମାନେ ଜାଣିପାରି ଅପ୍ ରାସ୍ତାରୁ ଡାଉନ୍ ରାସ୍ତାକୁ ଗଲାବେଳେ ପଶ୍ଚିମବଂଗରୁ ବାଲେଶ୍ୱର ଅଭିମୁଖେ ଯାଉଥିବା ଟ୍ରକ ଧକ୍କା ଦେଇଥିଲା । ଫଳରେ ଆଶା ଟୁଡୁ(୨୦), ମାମି ମୁର୍ମୁ(୨୦), ଯବା ହାଁସଦା (୧୭), ସୁକାନ୍ତି ହାଁସଦା(୧୬), ଗୌରୀ ମୁର୍ମୁ(୨୧), ଲାଲମଣି ହାଁସଦା(୧୭), ପଂକଜିନୀ ହେମ୍ବ୍ରମ(୧୮), ଦେବକି ମୁର୍ମୁ(୨୨), ଉତ୍ତର ପଡାର ଅଶ୍ୱିନୀ ମାଝୀ (୧୯) ପ୍ରମୁଖ ଗୁରୁତର ଆହତ ହୋଇଛନ୍ତି । ସେମାନଙ୍କ ମଧ୍ୟରୁ ପଂକଜିନୀ ଓ ଦେବକୀ ଗୁରୁ ତର ଥିବାରୁ ଜିକେ ଭଟ୍ଟର ହସ୍ପିଟାଲରେ ପ୍ରାଥମିକ ଚିକିତ୍ସା ପରେ ବାଲେଶ୍ୱର ସ୍ଥାନାନ୍ତର କରାଯାଇଛି । ଅନ୍ୟ ସମସ୍ତେ ଭଟ୍ଟର ହସ୍ପିଟାଲରେ ଚିକିତ୍ସାଧିନ ଅଛନ୍ତି । ଓଡି୦୧ଜେ-୨୯୧୨ ଟାଟା ମ୍ୟାଜିକ୍ ରାସ୍ତା ବଦଳାଉଥିବା ବେଳେ ଜିଏ୦୩ଡବ୍ଲ୍ୟୁ-୩୮୮୮ ଟ୍ରକ୍ଟି ଧକ୍କା ଦେଇଥିଲା । ଦୁର୍ଘଟଣାପରେ ଟାଟା ମ୍ୟାଜିକ୍ ରାସ୍ତାକଡକୁ ଓଲଟି ପଡିଥିବା ବେଳେ ଆହତ ମାନଙ୍କୁ ସ୍ଥାନୀୟ ଲୋକେ ଉଦ୍ଧାର କରି ହାଇୱେ ଆମ୍ବୁଲାନ୍ସକୁ ଖବର ଦେଇଥିଲେ । ଦୁଇଗାଡିର ଡ୍ରାଇଭର ଫେରାର ଥିବା ଜଣାଯାଇଛି ।
ରିପୋର୍ଟ : ଭୂପତି କୁମାର ପରିଡା