ପାଟପୁର (ସମୃଦ୍ଧ ଓଡିଶା) ଗୁରୁବାର ତଥା ଗତକାଲି ସକାଳ ୧୦ ଘଣ୍ଟା ପାଟପୁର ଥାନା ଅଧିନସ୍ଥ ଗାନ୍ଧୀଛକ ଠାରେ ଏକ ଟ୍ରାକ୍ଟର ଧକ୍କାରେ ଜଣେ ସପ୍ତମ ଶ୍ରେଣୀ ଛାତ୍ରର ମୃତ୍ୟୁ ଘଟିଥିବା ଜଣାପଡିଛି । ମୃତ ଛାତ୍ର ଜଣକ ହେଲେ ପାଟପୁର ଗ୍ରାମର ରେଡ୍ଡୀକା ସାହି ସ୍ଥିତ ଲକ୍ଷ୍ମୀ ନାରାୟଣ ସାହୁଙ୍କ ପୁତ୍ର ସୁବ୍ରତ କୁମାର ସାହୁ (୧୨) । ମୃତ ସୁବ୍ରତ ସବୁଦିନ ଭଳି ଗୁରୁବାର ସକାଳେ ନିକଟସ୍ଥ ମହାନଳା ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟକୁ ଯିବା ବାଟରେ ପାଟପୁରରୁ ଦିଗପହଣ୍ଡି ଅଭିମୁଖେ ଆସୁଥିବା ଗୋଡି ବୋଝେଇ ଟ୍ରାକ୍ଟର (ଓଆର୦୭ ଙ୍ଗ ୧୩୧୭) ସୁବ୍ରତଙ୍କୁ ଧକ୍କା ଦେଇଥିବା ଖବର ମିଳିଛି । ଫଳରେ ସୁବ୍ରତ ରାସ୍ତାରେ କଚାଡି ହୋଇ ପଡ଼ିଯାଇଥିଲେ । ଗୁରୁତର ଅବସ୍ଥାରେ ସ୍ଥାନୀୟ ଲୋକଙ୍କ ଉଦ୍ଧାର କରାଯାଇ ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା କିନ୍ତୁ ସେଠାରେ ଉପସ୍ଥିତ ଥିବା ଡ଼ାକ୍ତର ବହୁ ଚେଷ୍ଟା କରି ଶେଷରେ ମୃତ ଘୋଷଣା କରିଥିଲେ । ଘଟଣାସ୍ଥଳରେ ପାଟପୁର ପୋଲିସ ପହଞ୍ଚି ଟ୍ରାକ୍ଟରକୁ ଜବତ କରିବା ସହ ଥାନା କେସ ନଂ- ୪୨/୧୯ ଅନୁଯାୟୀ ମୃତ ସୁବ୍ରତଙ୍କ ଶବକୁ ଜବତ କରି ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ପଠାଇଛନ୍ତି ।
ରିପୋର୍ଟ : ଜିଲ୍ଲା ସ୍ୱତନ୍ତ୍ର ପ୍ରତିନିଧି ନିମାଇଁ ଚରଣ ପଣ୍ଡା