ଭୁବନେଶ୍ୱର(ସମୃଦ୍ଧ ଓଡ଼ିଶା)ସାରା ଦେଶରେ ତୀବ୍ର ବିରୋଧ ସତ୍ୱେ ମୋଦି ସରକାର ପ୍ରଚଳନ କରିଥିବା ନାଗରିକତା ସଂଶୋଧନ ଆଇନକୁ ସମର୍ଥନ ପାଇଁ ପୂରା ଦମରେ ଲାଗିଛନ୍ତି କେନ୍ଦ୍ରରେ ଦୁଧିଆଳୀ ବିଭାଗ ସମ୍ଭାଳି ଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ନାଗରିକତା ସଂଶୋଧନ ଆଇନ ସମର୍ଥନରେ ବିଜେପିର ରୋଡ୍ ସୋ ଶୋଭାଯାତ୍ରା । କଟକର କଲେଜ ଛକରୁ ଶୋଭାଯାତ୍ରା ଆରମ୍ଭ କରିଥିଲେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ହାତରେ ତ୍ରିରଙ୍ଗା ଧରି ଶୋଭାଯାତ୍ରାରେ ସାମିଲ ହୋଇଥିଲେ ହଜାର ହଜାର କର୍ମୀ ଓ ନେତା। ରାଲି କଲେଜ ଛକରୁ ବାହାରି ବାଦମବାଡି ଦେଇ ଖାନନଗରରେ ପହଁଞ୍ଚିଥିଲା। ନାଗରିକତା ଆଇନ କଣ ଓ ଏଥିରେ ମୁସଲମାନ ସଂପ୍ରଦାୟ ଲୋକଙ୍କର କିପରି କ୍ଷତି ହେବନି ସେ ନେଇ ଦଳ ପ୍ରସ୍ତୁତ କରିଥିବା ଲିଫଲେଟ୍ ବାଣ୍ଟିଥିଲେ କର୍ମୀମାନେ । ସିଏଏ ନାଗରିକତା ନେବା ପାଇଁ ନୁହେଁ ବରଂ ଦେବା ପାଇଁ ବୋଲି କହିଥିଲେ ଧର୍ମେନ୍ଦ୍ର ପ୍ରଧାନ । ମହାତ୍ମା ଗାନ୍ଧିଙ୍କଠାରୁ ଆରମ୍ଭ କରି ଇନ୍ଦିରା ଗାନ୍ଧି, ରାଜୀବ ଗାନ୍ଧି ଓ ମନମୋହନ ସିଂ ଯାହା ଚାହିଁଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାହା କରିଦେଖାଇଲେ ବୋଲି ଲୋକଙ୍କୁ କହିଥିଲେ । ଶରଣାର୍ଥୀଙ୍କୁ ନାଗରିକତା ଦେବା ଯୋଗୁ ପାକିସ୍ତାନ ଓ ISIକୁ କଷ୍ଟ ହେଉଥିବା ବେଳେ କଂଗ୍ରେସକୁ ମଧ୍ୟ କଷ୍ଟ ହେଉଛି ବୋଲି କଟାକ୍ଷ କରିଥିଲେ ଧର୍ମେନ୍ଦ୍ର। ଶୋଭାଯାତ୍ରାରେ ସାମିଲ ହୋଇଥିବା ମୁସଲିମ୍ ସଂପ୍ରଦାୟର ଲୋକ ବି ନାଗରିକାତ ସଂଶୋଧନ ସପକ୍ଷରେ ଲୋକଙ୍କୁ କହିଥିଲେ ବୋଲି କୁହାଯାଉଛି । ଏପଟେ ବିଜେପି କରିଥିବା ଭୁଲକୁ ଘୋଡାଇବାକୁ ସଚେତନା ଶୋଭାଯାତ୍ରା କରୁଛି ବୋଲି ପାଲଟା ଅଭିଯୋଗ ଆଣିଛି କଂଗ୍ରେସ। ବିଜେପିର ଜନଜାଗରଣ ଅଭିଯାନ ଡ୍ୟାମେଜ କଣ୍ଟ୍ରୋଲ ପାଇଁ ବୋଲି କହିଛି ବିଜେଡି । ସେହିପରି ଆଜି ନୟାଗଡରେ ଦଳର ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର ସିଏଏ ସମର୍ଥନରେ ସାମ୍ବାଦିକ ସମ୍ମିଳନୀ କରିଛନ୍ତି । ସିଏଏ ସପକ୍ଷରେ ଜନମତ ସୃଷ୍ଟି ପାଇଁ ୧୦ ଦିନରେ ରାଜ୍ୟର ୧ କୋଟି ଲୋକଙ୍କ ପାଖରେ ପହଁଞ୍ଚିବାକୁ ଲକ୍ଷ୍ୟ ରଖିଛି ବିଜେପି ବୋଲି ଶୁଣିବାକୁ ମିଳିଛି ।
