ଜଳେଶ୍ୱର (ସମୃଦ୍ଧ ଓଡିଶା) ଦିନ ଦ୍ୱି ପ୍ରହରରେ ଜନଗହଳିପୂର୍ଣ୍ଣ ବିଚ୍ ବଜାରରେ ଜଣେ ମହିଳାଙ୍କ ଠାରୁ ବାବା ବେଶରେ ଆସି ୩ଲକ୍ଷ ଟଙ୍କାର ସୁନା ଗହଣା ଲୁଟି ନେଇ ଚମ୍ପଟ ମାରିବା ଘଟଣା ଜଳେଶ୍ୱର ଅଂଚଳରେ ଚର୍ଚ୍ଚାର ବିଷୟ ପାଲଟିଛି । ଘଟଣାରୁ ପ୍ରକାଶ ପଶ୍ଚିମବଙ୍ଗର ଯାଦବପୁର ଅଞ୍ଚଳର ଜୟା ଦେ ନିଜ ବାପ ଘର ବାଲେଶ୍ୱର ଜିଲାର ଜଳେଶ୍ୱର ପୌରପରିଷଦ ଅନ୍ତର୍ଗତ ବଡବଜାରସ୍ଥିତ କରସାହିକୁ ବୁଲି ଆସିଥିଲେ । ମଙ୍ଗଳବାର ମଧ୍ୟାହ୍ନରେ ସେ ଏକ ଚୁଡି ଦୋକାନକୁ ଯିବା ସମୟରେ ୨ଜଣ ବାବା ବେଶରେ ଦୁବୃତ୍ତ ତାଙ୍କ ରାସ୍ତା ଓଗାଳିଥିଲେ । ମହିଳା ଜଣକ ବିଭିନ୍ନ ମାନସିକ ସମସ୍ୟା ମଧ୍ୟରେ ଗତି କରୁଥିବା ଓ ତାଙ୍କ ପୁତ୍ର ଅକାଳରେ ମରିଯିବାର ଭବିଷ୍ୟବାଣୀ ଶୁଣାଇ ବିଶ୍ୱାସ ଜମାଇଥିଲେ । ତାଙ୍କ ଗ୍ରହ ଖଣ୍ଟନ ଲାଗି କିଛି କର୍ପୁର ଅଣାଇ ଭୌତିକ କାର୍ଯ୍ୟ ଆରମ୍ଭ କରି ସମ୍ମୋହନ କରିଥିଲେ । ମହିଳା ଜଣକୁ ପିନ୍ଧଥିବା ସୁନା ହାର, କାନଫୁଲ, ହୀରା ମୁଦି ଓ ସୁନା ବଳା ଆଦି ଅଳଙ୍କାର ବାହାର କରି ଗୋଟିଏ ପର୍ସରେ ରଖିବାକୁ କହିଥିଲେ । ଏହାପରେ ତାଙ୍କୁ ଆଖିବୁଜି ଆର୍ଶିବାଦ ଦେବା ବାହାନାରେ ଅଡେଇ ପାଦ ଆଗକୁ ଯିବାକୁ ପ୍ରବର୍ତ୍ତାଇ ଥିଲେ । ଏହାର ସୁଯୋଗ ନେଇ ପୂର୍ବରୁ ପ୍ରସ୍ତୁତ ହୋଇ ରହିଥିବା ଅନ୍ୟଜଣେ ସହକର୍ମୀଙ୍କ ବାଇକ୍ ଯୋଗେ ଗହଣା ବ୍ୟାଗ୍ ନେଇ ଚମ୍ପଟ ମାରିଥିଲେ । ମହିଳା ଜଣକ ପଛକୁ ଘୁରି ଚାହିଁବା ପରେ ତାଙ୍କ ପିଛା କରି ବିଫଳ ହୋଇଥିଲେ । ଏ ସମ୍ପର୍କରେ ଥାନାରେ ଅଭିଯୋଗ ପରେ ଆଖପାଖରେ ଥିବା ସିସି ଟିଭି ଫୁଟେଜ୍ ଆଧାରରେ ତଦନ୍ତ ଚାଲିଥିବା ଜଣାଯାଇଛି । ସୂଚନାଯୋଗ୍ୟ ଜଳେଶ୍ୱର ଥାନାଠାରୁ ମାତ୍ର ୨୦୦ ମିଟର ଦୂର ଉକ୍ତ ସ୍ଥାନରେ ଏପରି ବାରମ୍ବାର ଛିନ୍ତାଇ ଓ ରାହାଜାନି ଘଟୁଥିବାରୁ ପ୍ରଶାସନକୁ ଚ୍ୟାଲେଞ୍ଜ ହେଉଥିବା ସାଧାରଣରେ ଆଲୋଚନା ହେଉଛି ।
ରିପୋର୍ଟ : ଭୂପତି ପରିଡା
