ଭୁବନେଶ୍ୱର(ସମୃଦ୍ଧଓଡିଶା)ମହାତ୍ମାଗାନ୍ଧୀ କହିଥିଲେ ‘ଆମ ଦେଶର ଭବିଷ୍ୟତ ଆମ ଉପରେକିମ୍ବା ପିତାମାତାଙ୍କ ଉପରେନୁହେଁ ବରଂଆମର ପିଲାମାନଙ୍କ ଉପରେନିର୍ଭର କରେ । ’ ଏକ ସୁନ୍ଦର ରାଷ୍ଟ୍ର ନିର୍ମାଣର ସ୍ୱପ୍ନ କୁ ସାକାର କରିବା ଉଦ୍ଦେଶ୍ୟରେ ଆମର ସବୁଠାରୁ ମୂଲ୍ୟବାନ ସଂପତ୍ତି, ଆମ ଶିଶୁମାନଙ୍କ ଉଜ୍ଜ୍ୱଳ ଭବିଷ୍ୟତ ନିର୍ମାଣ ଦିଗରେ ଆମେ ସମସ୍ତେ ସମ୍ମିଳିତ ସଙ୍କଳ୍ପବଦ୍ଧ ଉଦ୍ୟମ କରିବାକୁ ଉପମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡ଼ା ଆଜି ଆହ୍ୱାନ ଦେଇଛନ୍ତିା ରାଜ୍ୟ ସ୍ତରୀୟ ଶିଶୁ ମହୋତ୍ସବ ମହକ ଉଦ୍ଘାଟନ କରି ମହିଳା ଓ ଶିଶୁ ବିକାଶ ବିଭାଗର ଉପ ମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡ଼ା କହିଲେ ଯେ ପିତୃ ମାତୃ ହୀନ ଶିଶୁ ମାନେ ଭଗବାନଙ୍କ ଆଶୀର୍ବାଦ ପ୍ରାପ୍ତ । ପୂର୍ବରୁ ରାଜ୍ୟ ସ୍ତରୀୟ ଶିଶୁ ମହୋତ୍ସବର ନାମ ଥିଲା ‘ରେନ୍ବୋ’, ଯାହା ମଝିରେ ମଝିରେ ଆକାଶରେ ପରି ଦୃଶ୍ୟ ହୋଇଥାଏ । ପରେ ରେନ୍ବୋ ନାମକୁ ପରିବର୍ତ୍ତନ କରି ମହକ ରଖା ଯାଇଥିଲା ।ଏହି ନାମ କରଣ ବାସ୍ତବିକ୍ ଯଥାର୍ଥ । କୋଭିଡ୍-୧୯ ମହାମାରୀ ସମୟରେ ପିତୃ ମାତୃ ହୀନ ଶିଶୁମାନଙ୍କ ଲାଳନ ପାଳନ ପାଇଁ ଯଶସ୍ୱୀ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ‘ପିଏମ୍ କେୟାର’ ଯୋଜନା ଆରମ୍ଭ କରିଥିଲେ। ଏବେ ମହିଳା ଓ ଶିଶୁ ବିକାଶ ବିଭାଗ ଦ୍ୱାରା ପରିଚାଳିତଶିଶୁ ଯନି ଅନୁଷ୍ଠାନ ସେହି ଭଳି ସମୁଚିତ ଲାଳନ ପାଳନରେ ପ୍ରୟାସରତ। ଏହିଉତ୍ସବରେ ସମ୍ମାନିତ ଅତିଥି ରୂପେ ଯୋଗ ଦେଇ ଆଇନ୍, ପୂର୍ତ୍ତ ଓ ଅବକାରୀ ମନ୍ତ୍ରୀ ଶ୍ରୀ ପୃଥ୍ୱୀରାଜ ହରିଚନ୍ଦନ କହିଲେ ଯେ ଶିଶୁମାନେ ହେଉଛନ୍ତି ନିଷ୍ୱାପ, କଳୁଷତା ସେମାନଙ୍କୁ ସ୍ପର୍ଶ କରି ନ ଥାଏ। ସେଥିପାଇଁ ସେମାନଙ୍କୁ ଦେବତାର ଆଖ୍ୟା ଦିଆ ଯାଇଥାଏ । କୌଣସି ନା କୌଣସି କାରଣରୁ ଯେଉଁ ଶିଶୁମାନଙ୍କୁ ପିତା ମାତାଙ୍କ ସ୍ନେହ ଓ ଶ୍ରଦ୍ଧା ମିଳି ପାରିନି, ସେମାନଙ୍କ ଉପରେ ସ୍ୱତନ୍ତ୍ର ଦୃଷ୍ଟି ଦିଆଯିବା ଜରୁରୀ। ଶିକ୍ଷା ଶେଷ ପର୍ଯ୍ୟନ୍ତ ସେମାନଙ୍କ ଦକ୍ଷତା ଓ ଅର୍ନ୍ତନିହିତ ପ୍ରତିଭାର ପୂର୍ଣ୍ଣ ବିକାଶ ଜରୁରୀ। ଏହିଭଳି କୋମଳମତି ଶିଶୁମାନଙ୍କୁ ଶ୍ରଦ୍ଧା, ସ୍ନେହ ଓ ସଦିଚ୍ଛାରହାତ ବଢ଼ାଇ, ସେମାନଙ୍କ ମୁହଁରେ ହସ ଫୁଟାଇ ଓ ସମାଜରେ ସେମାନଙ୍କୁ ସମ୍ମାନ ଓ ପ୍ରତିଷ୍ଠା ମିଳିବା ପାଇଁ ଉଦ୍ୟମ କରୁଥିବା ଶିଶୁ ଯେଉଁ ଅନୁଷ୍ଠାନର ଭୂମିକା ବାସ୍ତବିକ ଅଭିନନ୍ଦନୀୟ । ସମଗ୍ର ରାଜ୍ୟରେ ୨୨୫ଟି ପଞ୍ଜିକୃତ ଶିଶୁ ଅନୁଷ୍ଠାନରେ ୮୬୮୩ରୁ ଅଧିକ ଶିଶୁମାନଙ୍କର ଯନି, ସୁରକ୍ଷା, ବିକାଶ, ତଥା ସହ ଭାଗିତାର ଅଧିକାର ଗୁଡ଼ିକୁ ଜିଲ୍ଲା ଶିଶୁସୁରକ୍ଷା ୟୁନିଟ୍ ଗୁଡ଼ିକ ମାଧ୍ୟମରେ ନିଶ୍ଚିତ କରାଯାଉଥିବା ପ୍ରଶଂସନୀୟ । ପିତୃମାତୃ ହୀନ ଶିଶୁର ସମୁଚିତ ଲାଳନ ପାଳନ ପାଇଁ ସରକାର ଚିନ୍ତା କରି ସେମାନଙ୍କୁ ଏକ ଯୋଜନାରେ ଅନ୍ତର୍ଭୁକ୍ତ କରିବା ଆବଶ୍ୟକ। ମନ୍ତ୍ରୀ ଶ୍ରୀ ହରିଚନ୍ଦନଏହି ଭଳି ୫ଟି ଶିଶୁଙ୍କ ସଂପୂର୍ଣ୍ଣ ଦାୟିତ୍ୱ ନେବେ ବୋଲି ପ୍ରକାଶ କରିଥିଲେ। ଅନ୍ୟତମ ସମ୍ମାନିତ ଅତିଥି ଭାବେ ଉଚ୍ଚଶିକ୍ଷା, ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି, କ୍ରୀଡ଼ା ଓ ଯୁବସେବାମନ୍ତ୍ରୀଶ୍ରୀ ସୂର୍ଯ୍ୟବଂଶୀ ସୂରଜ କହିଲେ ଯେ ବଣ ମଲ୍ଲୀ ବଣରେ ଫୁଟି ମଉଳି ନ ଯାଉ । ଯେଉଁ ଶିଶୁମାନେ କମ୍ ବୟସରୁ ସଂଘର୍ଷ ଦେଖିଛନ୍ତି ଓ ପାରିବାରିକ ସୁରକ୍ଷାରୁ ବଞ୍ଚିତ ହୋଇଛନ୍ତି, ସେମାନଙ୍କ ପ୍ରତିଭାର ଉନ୍ମେଷ ଓ ବିକାଶ ହେବା ଜରୁରୀ। ସେମାନଙ୍କ ପ୍ରତିଭା ପ୍ରଦର୍ଶନ ଓ ହସ୍ତଶିଳ୍ପ ହସ୍ତକଳାର ପ୍ରସାର ନିମନ୍ତେ ଡିଜିଟାଲ ପ୍ଲାଟଫର୍ମ ଯୋଗାଇ ଦେଇ ପାରିଲେ ବିଶ୍ୱ ବ୍ୟାପୀ ଆଦୃତି ମିଳିବ।ରାଜ୍ୟର ଉପାନ୍ତ, ସୀମାନ୍ତ ଓ ଗ୍ରାମ୍ୟ ପ୍ରତିଭାମାନଙ୍କୁ ଉତ୍ସାହ ଓ ପ୍ରୋତ୍ସାହନ ଯୋଗାଇ ଦେଇ ପାରିଲେ ସେମାନଙ୍କ ପ୍ରତିଭାର ମହକରେ ସାରା ବିଶ୍ୱରେ ମହକ ଖେଳିଯିବ ବୋଲି ମନ୍ତ୍ରୀ ଶ୍ରୀ ସୂରଜ ମତବ୍ୟକ୍ତ କରିଥିଲେ। ମହିଳା ଓ ଶିଶୁ ବିକାଶ ବିଭାଗର ପ୍ରମୁଖ ଶାସନସଚିବ ଶ୍ରୀମତୀ ଶୁଭାଶର୍ମା ସ୍ୱାଗତ ଭାଷଣ ଦେଇ କହିଲେ ଯେ ପୁଷ୍ପର ମହକ ଯେପରି ସବୁଆଡ଼େ ଖେଳିଯାଏ ସେହି ପରି ଶିଶୁ ଯନି ଅନୁଷ୍ଠାନର ପିଲା ମାନଙ୍କ ମହକ ଓ ପ୍ରତିଭା ରାଜଧାନୀ ଭୁବନେଶ୍ୱରର ଚାରିଆଡ଼େ ବ୍ୟାପୀ ଯାଇଛି ।ଏହି ପ୍ରତିଭାବାନ ଶିଶୁ ମାନଙ୍କ ସମୁଚିତ ଉନ୍ନତି ଓ ବିକାଶ ପାଇଁ ମହିଳା ଓ ଶିଶୁ ବିକାଶ ବିଭାଗ ସବୁ ବେଳେ ପ୍ରୟାସରତ। ମହକ ସେହି ପ୍ରୟାସର ସଫଳ ଉଦ୍ଭାବନା । ଯେଉଁ ଶିଶୁମାନେ ୫ ଦିନ ଧରି ଉଚ୍ଚ କୋଟୀର ପ୍ରତିଭା ପ୍ରଦର୍ଶନ କରିବେ, ସେମାନେ ପୁରସ୍କୃତ ହେବେ ବୋଲି ଶ୍ରୀମତୀ ଶର୍ମା କହିଥିଲେ। ଶିଶୁ ସୁରକ୍ଷା ସହାୟତା ନମ୍ବର-୧୦୯୮ର ଭିଡିଓକୁ ଉପ ମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡ଼ା ଲୋକାର୍ପିତ କରିଥିଲେ। ଶିଶୁକଳାକାର ବିଦୂସ୍ମିତା ଶବର ଚିତାକର୍ଷକ ଗୀତ ପରିବେଷଣ କରି ସମସ୍ତଙ୍କ ମନ ମୋହି ନେଇଥିଲେ। ମହିଳା ଓ ଶିଶୁ ବିକାଶ ନିର୍ଦ୍ଦେଶିକା ଶ୍ରୀମତୀ ମୋନିଷା ବାନାର୍ଜୀ ଧନ୍ୟବାଦ ଅର୍ପଣ କରିଥିଲେ। ପିଲାମାନେ ସ୍ୱହସ୍ତରେ ଆଙ୍କିଥିବା ଚିତ୍ରକୁ ଅତିଥିମାନଙ୍କୁ ଭେଟି ଦେଇଥିଲେ। ପୂର୍ବରୁ ଆଦୃତ ଶିଶୁଗୃହ, ଖୋର୍ଦ୍ଧାର ଶିଶୁ ପ୍ରତିଭାମାନଙ୍କ ଦ୍ୱାରା ‘ବନ୍ଦେ ଉତ୍କଳ ଜନନୀ’ ସଙ୍ଗୀତଗାନ କରାଯାଇଥିଲା। ଶେଷରେ କଳିଙ୍ଗଷ୍ଟାଡିୟମ୍ ପରିସରରେ ବେଲୁନ୍ ଉଡ଼ାଇ ଉପମୁଖ୍ୟମନ୍ତ୍ରୀ ଓ ଅନ୍ୟ ମନ୍ତ୍ରୀ ଦ୍ୱୟ ରାଜ୍ୟ ଶିଶୁ ମହୋତ୍ସବ ମହକର ଉଦ୍ଘାଟନ କରିଥିଲେ।
ରିପୋର୍ଟ : ରଜତ ମହାପାତ୍ର ଓ ମାନସରଞ୍ଜନଖୁଣ୍ଟିଆ, ସୂଚନା ଅଧିକାରୀ
