ପାରଳାଖେମୁଣ୍ଡି (ସମୃଦ୍ଧ ଓଡିଶା) ହେ ମହାବାହୁ, ପରମ ବ୍ରହ୍ମ ନାରାୟଣ ଆପଣ କଳିଯୁଗରେ ନୀଳକନ୍ଦରେ ବିଜେ କରି ସମସ୍ତ ଜଗତର ହର୍ତ୍ତା, କର୍ତ୍ତା ଭାଗ୍ୟ ବିଧାତା ।” କି ଭାବମୟ, ଭକ୍ତିଭରା କଣ୍ଠରେ ମହାବିଷ୍ଣୁଙ୍କ ସାକ୍ଷାତ ରୂପ ଓ ବ୍ରହ୍ମରେ ଶ୍ରୀଜଗନ୍ନାଥ ପାବନ ଶଙ୍ଖକ୍ଷେତ୍ରରେ ବିରାଜମାନ ସେ ଉପରେ ଗଭୀରଭାବେ ଆଲୋକପାତ କରି ୧୨ ବର୍ଷର ଏ ଝିଅ ଅଙ୍କିତା ପ୍ରିୟଦର୍ଶନୀ ଗାଇଛି ହୃଦୟ ତଳର ନିଭୃତ କୋଣରେ ଭାବମୟ ଭକ୍ତି ପରିଵେଶର ପ୍ରତିଧ୍ୱନୀ ଗୁଞ୍ଜରଣ ସୃଷ୍ଟି କରିପାରୁଛି । ମହାବିଷ୍ଣୁ ଭଗବାନଙ୍କର ଆବାସସ୍ଥଳ ଶ୍ୱେତଗିରି ଓ ତାଙ୍କର ଦୀପ ଶ୍ୱେତଦୀପ । ସଦାସର୍ବଦା ଶ୍ୱେତଗିରିରେ ବିରାଜମାନ ଭଗବାନଙ୍କୁ ଧ୍ୟାନ କରୁଛୁ । ବିଷ୍ଣୁଙ୍କ ସମ୍ମୁଖରେ ମହାଲକ୍ଷ୍ମୀ ମହାପ୍ରଭୁଙ୍କ ଗୁଣଗାନ କରିବା ସହ ଲକ୍ଷ୍ମୀଙ୍କର ନିବାସରେ ଶ୍ୱେତଗିରି ସୁଶୋଭିତ ହୋଇପାରିଛି । ସେ ହିଁ ଆମର ଶ୍ରୀଜଗନ୍ନାଥ, ପରମବ୍ରହ୍ମ, ନାରାୟଣ ମହାବିଷ୍ଣୁ । କୋଟିଏ ବ୍ରହ୍ମାଣ୍ଡର ଗୋଟିଏ ବ୍ରହ୍ମ ସେ ଆମ ଜଗନ୍ନାଥ । କୋଟିଏ କଣ୍ଠରେ ଗୋଟିଏ ଉଚ୍ଚାରଣ ସେ ଆମର ଶ୍ରୀଜଗନ୍ନାଥ । ସମଗ୍ର ଜଗତ ତୁମର ଆଜ୍ଞାଧୀନ ହେ କଳାଶ୍ରୀମୁଖ ନାରାୟଣ । ପତ୍ରର ସବୁ ଜିମାରେ ତୁମରି ସୃଜନୀ, ଫୁଲର ଓଠର ସ୍ମିତହସରେ ଆନନ୍ଦର ଅପାର ପବିତ୍ର ଅବନାକ୍ଷର ଝରି ଆସୁଛି । ସମଗ୍ର ବିଶ୍ୱ ମାୟା ଜାଲରେ କବଳିତ କିନ୍ତୁ ହେ ଜଗନ୍ନାଥ ତୁମେ ଏହି ମାୟା ମୋହର ଉର୍ଦ୍ଧରେ । ଘଣ୍ଟୁଆର ଘଣ୍ଟରେ ହେ ଚକାନୟନ ତୁମରି ଆଳତୀ ଉଠୁଥିବାବେଳେ, ଘଟୁଆରୀର ଘୋରା ଚନ୍ଦନରେ ହେ କଳାଶ୍ରୀମୁଖ ରାତି ଦିନ ତୁମର ଅର୍ଚ୍ଚନା, ଚନ୍ଦନ ଲାଗି କରାଯାଇଥାଏ । ମିଛ, ମୋହ, ମାୟାରେ ସମଗ୍ର ବିଶ୍ୱ ଘୋଟି ରହିଥିବାବେଳେ ତୁମେ ହିଁ ଏ ଜୀବନରେ ଏକମାତ୍ର ସତ୍ୟ, ସନାତନ।ତବ ଦର୍ଶନରେ ସକଳ ଜୀବନର ପାପ ନାଶନ ସହ ମୁକ୍ତିର ପଥ ଉନ୍ମୋଚନ ହୋଇପାରୁଛି । ଏଣୁ ଲକ୍ଷ୍ମୀଙ୍କ ଆବାସରେ ଆପଣଙ୍କ ଶ୍ୱେତଗିରିରେ ଶ୍ୱେତଦୀପ ସଦା ସର୍ବଦା ପ୍ରଜ୍ୱଳିତ ହେଉଛି । ବ୍ରହ୍ମପୁରାଣାନୁଯାୟୀ ପୁରୁଷୋତ୍ତମ ଶଙ୍ଖକ୍ଷେତ୍ରରେ ଦାରୁରୂପୀ ଜଗନ୍ନାଥଙ୍କ ତତ୍ତ୍ୱ ଅତି ଗୋପନୀୟ । ସ୍ୱୟଂ ଭଗବାନ ଲକ୍ଷ୍ମୀଙ୍କୁ କହିଛନ୍ତି ଏହା ମୋର ଏକ ଗୁହ୍ୟ ତୀର୍ଥ । ପତିତଜନଙ୍କୁ ଉଦ୍ଧାର କରିବାକୁ ବ୍ୟାଜ ଶରୀର ଧାରଣ କରିଛନ୍ତି । ସ୍କନ୍ଦପୁରାଣରେ ଏହା ବର୍ଣ୍ଣନା କରାଯାଇଛି । ଅବ୍ୟୟ ଆନନ୍ଦ ପ୍ରଦାନ କରିବା ସହ ଶ୍ରୀକ୍ଷେତ୍ର ବିଷ୍ଣୁଙ୍କ ଆଳୟ ଅଟେ । ଏହା ହିଁ ମର୍ତ୍ତ୍ୟବୈକୁଣ୍ଠ ଓ ନିତ୍ୟ ଗୋଲକ । ଏଣୁ ନୀଳାଚଳ ପରମପୁରୁଷଙ୍କ ନିତ୍ୟ ଲୀଳାକ୍ଷେତ୍ର ।
ରିପୋର୍ଟ : ଦାମୋଦର ପାଢ଼ୀ
