ଢେଙ୍କାନାଳ (ସମୃଦ୍ଧ ଓଡିଶା) କାଳିଆ ଯୋଜନାରେ ଅର୍ଥ ହ୍ରାସ ନିଷ୍ପତ୍ତିର ରଦ୍ଦ ନେଇ ନବ ନିର୍ମାଣ କୃଷକ ସଂଗଠନ ପକ୍ଷରୁ ଜିଲ୍ଲାପାଳଙ୍କୁ ଦାବି ପତ୍ର ପ୍ରଦାନ କରାଯାଇଛି । ଗତ ନିର୍ବାଚନ ପୂର୍ବରୁ ନବୀନ ସରକାର କାଳିଆ ଯୋଜନା ଘୋଷଣା କଲାବେଳେ ସାଧାରଣରେ ତିନୋଟି ପ୍ରତିଶ୍ରୁତି ରଖିଥିଲେ । ପ୍ରଥମେ କହିଥିଲେ ୭୦ ଲକ୍ଷ ଚାଷୀ କାଳିଆ ଯୋଜନାରେ ଉପକୃତ ହେବେ । କ୍ଷୁଦ୍ର ଚାଷୀ, ନାମମାତ୍ର ଚାଷୀ, ଭୂମିହୀନ ସମସ୍ତେ ଏଥିରେ ଉପକୃତ ହେବେ । ନିର୍ବାଚନ ଜିତିବାର ୨୪ଘଣ୍ଟା ମଧ୍ୟରେ ସମସ୍ତଙ୍କ ଜନଧନ ଆକାଉଣ୍ଟକୁ ଏହି ଟଙ୍କା ଯିବ । ତୃତୀୟରେ ଜଣେ ବି ଯୋଗ୍ୟ ଚାଷୀ କିଭଳି କାଳିଆ ଯୋଜନାରୁ ବଞ୍ଚିତ ହେବେ ନାହିଁ, ସେ ଦାୟିତ୍ୱ ମୋର ବୋଲି କହିଥିଲେ । ଦୁର୍ଭାଗ୍ୟର କଥା ନବୀନ ସରକାର ୫ ଥର ମୁଖ୍ୟମନ୍ତ୍ରୀ ହେଲା ପରେ ନା ୭୦ ଲକ୍ଷ ଚାଷୀଙ୍କୁ କାଳିଆ ଦେଲେ ନ ଯୋଜନାର ସ୍ୱଚ୍ଛତା ରହିଲା । ପ୍ରଥମ କିସ୍ତି ୨୪ ଲକ୍ଷ ଚାଷୀ ପାଇନଥିବା ବେଳେ ଦ୍ଵିତୀୟ କିସ୍ତି ୪୦ ଲକ୍ଷ ଚାଷୀ ପାଇନାହାନ୍ତି । ଏହା ବିରୁଦ୍ଧରେ ଆମେ ପ୍ରତିବାଦ କଲେ ମଧ୍ୟ ପ୍ରଶାସନ ଏ ନେଇ ମୂଖ୍ୟମନ୍ତ୍ରୀଙ୍କ ସହ ଆଲୋଚନା କରି ରାସ୍ତା ବାହାର କରୁନାହାନ୍ତି । ମର୍ଯ୍ୟାଦା ପୁରୁଷ ରାମଚନ୍ଦ୍ର ପିତୃସତ୍ୟ ପାଳି ନିଜେ ୧୪ ବର୍ଷ ବନବାସ ଯାଇଥିଲେ । ମାତ୍ର ଲଜ୍ଜାର କଥା ମୂଖ୍ୟମନ୍ତ୍ରୀ ନିର୍ବାଚନରେ ଚାଷୀଙ୍କ ଭୋଟରେ ଜିତିବାର ୬ ମାସ ପରେ ଚାଷୀଙ୍କୁ ଦେଇଥିବା ସମସ୍ତ ପ୍ରତିଶ୍ରୁତି ଭଙ୍ଗ କରିଛନ୍ତି । ବର୍ଷକୁ ପ୍ରତି ଚାଷୀର ୬ ହଜାର ଟଙ୍କା ପୁଣି ଛଡାଇ ନେଇଛନ୍ତି । ତୁରନ୍ତ ଚାଷୀଙ୍କ ୧୦ ହଜାର ଲେଖାଏଁ କାଳିଆ ଯୋଜନା ପ୍ରତିଶୃତିକୁ ନବୀନ ସରକାର ପାଳନ କରନ୍ତୁ ଓ ନିଜ ସତ୍ୟ ରକ୍ଷା କରନ୍ତୁ ବୋଲି ନବ ନିର୍ମାଣ କୃଷକ ସଂଗଠନ ପକ୍ଷରୁ ଦାବି ହୋଇଛି ।
ରିପୋର୍ଟ : ଶୁଭମ କୁମାର ପାଣି
