ବ୍ରହ୍ମପୁର (ସମୃଦ୍ଧ ଓଡିଶା) ଆସିଛି ରଙ୍ଗର ପର୍ବ ହୋଲି । ଆଜି ହୋଲି ଏହି ଅବସରେ ପ୍ରେମ ଓ ଭାଇଚାରାର ବାର୍ତ୍ତା ନେଇ ଆସିଥିବା ଏହି ପର୍ବକୁ ନେଇ ପୁଣି ଗାଁ ଠାରୁ ଆରମ୍ଭ କରି ସହର ପର୍ଯ୍ୟନ୍ତ ସମସ୍ତଙ୍କ ମନରେ ଉତ୍ସାହ । ସମସ୍ତେ ମିଶି ଆଜି ଏହି ପର୍ବକୁ ବହୁ ଉତ୍ସାହର ସହ ପାଳନ କରି ବନ୍ଧୁ ବାନ୍ଧବଙ୍କୁ ମିଠା ଖୁଆଇବା ସହ ଫଗୁ ରଙ୍ଗରେ ରଙ୍ଗେଇ ହୋଇଛନ୍ତି । ସବୁ ବର୍ଷ ଭଳି ଏ ବର୍ଷ ମଧ୍ୟ ବଜାରକୁ ଆସିଛି ୩ ଜି କଲର । ଲୋକଙ୍କ ମଧ୍ୟରେ ଧିରେ ଧିରେ ସ୍ୱାସ୍ଥ୍ୟକୁ ନେଇ ସଚେତନତା ବୃଦ୍ଧି ପାଉଥିବା ବେଳେ ଏହାକୁ ଦୃଷ୍ଟିରେ ରଖି ବହୁ ବ୍ୟବସାୟୀ କେମିକାଲ ରଙ୍ଗ କମ୍ ଏବଂ ହର୍ବାଲ୍ ରଙ୍ଗକୁ ଅଧିକ ପ୍ରାଧାନ୍ୟ ଦେଇଥିବା ଦେଖିବାକୁ ମିଳିଛି । ହର୍ବାଲ ରଙ୍ଗର ଦର ୩୦୦ରୁ ୪୦୦ ଟଙ୍କା ପର୍ଯ୍ୟନ୍ତ ବିକ୍ରୀ ହେଉଛି । ଚଳିତବର୍ଷ ଫଗୁ ଛୋଟ ପ୍ୟାକେଟ ୫ ଟଙ୍କାରୁ ୧୦ ଟଙ୍କା ରହିଥିବା ବେଳେ କେଜି ୧୦୦ ଟଙ୍କା ପର୍ଯ୍ୟନ୍ତ ରହିଛି । ସେହିଭଳି ରଙ୍ଗ ୫ ଟଙ୍କାରୁ ୫୦୦ ଟଙ୍କା ପର୍ଯ୍ୟନ୍ତ ରହିଛି । ପିଚିକାରୀ ୧୦୦ ଟଙ୍କାରୁ ଆରମ୍ଭ କରି ୧୫୦୦ ଟଙ୍କା ପର୍ଯ୍ୟନ୍ତ ରହିଛି । ସେହିପରି ଟୋପି ୫ ଟଙ୍କାଠାରୁ ଆରମ୍ଭ କରି ୨୦୦ ଟଙ୍କା ପର୍ଯ୍ୟନ୍ତ ରହିଛି । ସେହିଭଳି ଛୋଟଛୁଆଙ୍କ ପାଇଁ ଆସିଥିବା ହୋଲି ଖେଳନାର ଚାହିଦା ଦେଖିବାକୁ ମିଳିଛି । କଣ୍ଢେଇ ପିଚିକାରୀ, ପ୍ୟାକେଟ ବେଲୁନ୍ ଓ ୱାଟର୍ ଗନ୍ ଆଦି ଛୋଟ ଛୁଆଙ୍କ ପାଇଁ ରହିଛି । ଚଳିତବର୍ଷ ହୋଲି ପାଇଁ କିଛି ନୂଆ ଭାବେ ଲାଇଟ୍ ଚଷମା, ନୂଆ ପିଚିକାରି, ଆଇପିଏଲ୍ ପେଷ୍ଟ, ୩ ଡ଼ି ରେଡ଼ିୟମ୍ କଲର, ୮ ଟି ରଙ୍ଗର ସ୍ନୋ ସ୍ପ୍ରେ ଆଦି ବଜାକୁ ଆସିଛି । ବ୍ରହ୍ମପୁର ସହରର ବଡ଼ବଜାର, କମାପଲ୍ଲୀ, ସୁବାରାଓ ଛକ, ବିଜିପୁର ଓ ଗିରିମାର୍କେଟ ଆଦି ପ୍ରମୁଖ ବଜାର ଗୁଡ଼ିକରେ ବିଶେଷ ଭାବେ ରଙ୍ଗ ଓ ହୋଲି ସାମଗ୍ରି ବିକ୍ରୀ ହେଉଛି । ରାୟପୁର, ଦିଲ୍ଲୀ ଓ କୋଲକାତାରୁ ହୋଲି ଆସୁଥିବା ବେଳେ ଦକ୍ଷିଣ ଓଡ଼ିଶାର ବିଭିନ୍ନ ଜିଲ୍ଲାକୁ ଏଠାରୁ ରଙ୍ଗ ଯାଉଥିବା ବ୍ୟବସାୟୀ ମାନେ ପ୍ରକାଶ କରିଛନ୍ତି ।
ରିପୋର୍ଟ : ଜିଲ୍ଲା ସ୍ୱତନ୍ତ୍ର ପ୍ରତିନିଧି ନିମାଇଁ ଚରଣ ପଣ୍ଡା
