ଛତ୍ରପୁର (ସମୃଦ୍ଧ ଓଡିଶା) ଛତ୍ରପୁର ଆଦର୍ଶ ଥାନାକୁ ଗଞ୍ଜାମ ଏସପି ବ୍ରିଜେଶ କୁମାର ରଏ ପରିଦର୍ଶନ କରି ଥାନାର ସମସ୍ତ ନଥିପତ୍ର ଯାଞ୍ଚ କରିଛନ୍ତି । ଏହାପରେ ଥାନାରେ ପଡ଼ି ରହିଥିବା ବିଭିନ୍ନ ମାମଲା ଗୁଡିକ ସମ୍ପର୍କରେ ଥାନା ଅଧିକାରୀ ସତ୍ୟ ରଞ୍ଜନ ପ୍ରଧାନଙ୍କୁ ପଚାରି ବୁଝିଥିଲେ । ପୂର୍ବ ଆପେକ୍ଷା ଥାନା ପରିସର ଯାକ ଯକମ ହୋଇ ରହିଥିବାରୁ ଏସପି ଖୁସି ଜାହିର କରିଥିଲେ ଏବଂ ଥାନା ପରିସରରେ ଥିବା ସମସ୍ତ କକ୍ଷ ଓ ମାଲଖାନାକୁ ମଧ୍ୟ ବୁଲି ଅନୁଧ୍ୟାନ କରିଥିଲେ । ଥାନାକୁ ଆସୁଥିବା ପ୍ରତ୍ୟେକ ଜନସାଧାରଣ କିପରି ସମସ୍ତ ସୁବିଧା ସହ ଉଚିତ ନ୍ୟାୟ ପାଇପାରିବେ ସେଥି ନିମନ୍ତେ ସମସ୍ତେ ଧ୍ୟାନ ଦେବାକୁ ଏସପି କହିଥିଲେ । ଆଗାମୀ ଦିନରେ ହେବାକୁ ଥିବା ପଞ୍ଚାୟତ ନିର୍ବାଚନ ଯେପରି ଶାନ୍ତି ଶୃଙ୍ଖଳାର ସହ ସମାପନ ହୋଇପାରିବ ସେ ନେଇ ବିଶେଷ ଧ୍ୟାନ ରଖିବା ସହ ଥାନା ଅଞ୍ଚଳରେ ଥିବା ଦାଗୀ ଅପରାଧୀ ଚିହ୍ନଟ କରିବା ଓ ସେମାନଙ୍କ ଗତିବିଧି ଉପରେ ନଜର ରଖିବାକୁ କହିଛନ୍ତି । ଏହି ପରିଦର୍ଶନ ବେଳେ ଛତ୍ରପୁର ଥାନାର ସମସ୍ତ କର୍ମଚାରୀ ଉପସ୍ଥିତ ରହିଥିଲେ ।
ରିପୋର୍ଟ : ଜିଲ୍ଲା ପ୍ରତିନିଧି ନିମାଇଁ ଚରଣ ପଣ୍ଡା