ଛତ୍ରପୁର (ସମୃଦ୍ଧ ଓଡିଶା) ଛତ୍ରପୁରସ୍ଥିତ ସମର୍ଥ ଆବାସିକ ସ୍ୱତନ୍ତ୍ର ବିଦ୍ୟାଳୟର ୨୨ତମ ପ୍ରତିଷ୍ଠା ଦିବସ ଉପଲକ୍ଷେ ଗଞ୍ଜାମ ଜିଲ୍ଲା ଶାରିରୀକ ଭିନ୍ନକ୍ଷମ କଲ୍ୟାଣ ମହାସଂଘ ତରଫରୁ ଏକ ସାମ୍ବାଦିକ ସମ୍ମିଳନୀ ଗତକାଲି ଅନୁଷ୍ଠିତ ହୋଇଯାଇଛି l ପ୍ରତିବର୍ଷ ଏହି ଦିବସକୁ ସମର୍ଥ ପକ୍ଷରୁ ମହା ଆଡମ୍ବରରେ ପାଳନ କରାଯାଉଥିବା ବେଳେ କରୋନା ମହାମାରୀ ଯୋଗୁଁ ଏହା ଗତ ୨ ବର୍ଷ ହେଲା ପାଳନ ହୋଇ ପାରୁନାହିଁ l ଏହିପରି ବିପରୀତ ପରିସ୍ଥିତିରେ ମଧ୍ୟ ଅନୁଷ୍ଠାନ ତା’ର କାର୍ଯ୍ୟକ୍ରମମାନ ଯଥା ସମ୍ଭବ ସମ୍ପାଦନା କରି ଆସୁଛି ବୋଲି ଅନୁଷ୍ଠାନର ସମ୍ପାଦକ ଡ଼କ୍ଟର କେ. ଆନନ୍ଦ ରାଓ ପ୍ରକାଶ କରିଛନ୍ତି l ଆଜି ଏହି ଅନୁଷ୍ଠାନ ତା’ର ନିଜସ୍ୱ ସ୍ଥାନ ସାମୀୟାପଲ୍ଲୀଠାରେ ବୃକ୍ଷରୋପଣ ସହ ଡାମେୟାନ ନଗରଠାରେ ଥିବା ୪୮ ଭିନ୍ନକ୍ଷମ ପରିବାରର ୧୨୦ ଜଣ ଲୋକଙ୍କୁ ଖାଦ୍ୟ ବିତରଣ କରିଥିଲେ l ବିଗତ ୨୧ ବର୍ଷ ଭିତରେ ଏହି ଅନୁଷ୍ଠାନଟି ବହୁ ସଫଳତା ହାସଲ କରିଅଛି ଯଥା – ୪୯ ଜଣ ଭିନ୍ନକ୍ଷମ ଛାତ୍ରଛାତ୍ରୀ ମାଟ୍ରିକ ପାସ କରିଛନ୍ତି l ଭାରତ ଇତିହାସରେ ପ୍ରଥମଥର ପାଇଁ ୱିଲ୍ ଚେୟାର (Wheel Chair)ରେ ବସିଥିବା ଭିନ୍ନକ୍ଷମ ଛାତ୍ରଛାତ୍ରୀ ବିଜ୍ଞାନରେ +୨ ଉତ୍ତୀର୍ଣ୍ଣ ହେବା ସହ ଡାକ୍ତରୀ ଡ଼ିଗ୍ରୀ ହାସଲ କରି ପାରିଛନ୍ତି l ଏଠାରେ ପଢ଼ୁଥିବା ପିଲାମାନେ ଏମ୍ଟେକ୍, ସିଟି, ବି.ଇ.ଡି. ଏବଂ ଓକିଲାତି ଆଦି ପାଠ ସାରି ବହୁ ଛାତ୍ରଛାତ୍ରୀ ଶିକ୍ଷକ, କନିଷ୍ଠ କିରାଣୀ, ଡାଟା ଏଣ୍ଟ୍ରି ଅପରେଟର, ଫାର୍ମାସିଷ୍ଟ, ଅଙ୍ଗନବାଡି କର୍ମୀ ଆଦି ପଦବୀରେ ନିଯୁକ୍ତି ପାଇଛନ୍ତି l ଏଥିପାଇଁ ଅନୁଷ୍ଠାନ ବହୁଥର ଜିଲ୍ଲାସ୍ତରୀୟ, ରାଜ୍ୟସ୍ତରୀୟ ଓ ଜାତୀୟସ୍ତରରେ ମଧ୍ୟ ସମ୍ମାନୀତ ଓ ପୁରସ୍କୃତ ହୋଇଛି l ଗତ ବର୍ଷ ନାଲକୋ ସ୍ମାଇଲ୍ସ ସମ୍ମାନ ୨୦୨୦ରେ ସମ୍ମାନୀତ ହୋଇ ଓଡ଼ିଶାରେ ପ୍ରଥମ ସ୍ଥାନ ଅଧିକାର କରି ଏକ ଲକ୍ଷ ଅର୍ଥରାଶି ପାଇ ପାରିଛି l ଏହି ସାମ୍ବାଦିକ ସମ୍ମିଳନୀରେ ମହାସଂଘ ତରଫରୁ ଘୋଷଣା କରାଯାଇଥିଲା ଯେ, ଚଳିତବର୍ଷ ମହାସଂଘ ତରଫରରୁ ୩ଟି ନୂତନ କାର୍ଯ୍ୟକ୍ରମ ଆରମ୍ଭ କରାଯିବ l ସେଥିମଧ୍ୟରୁ ବ୍ରହ୍ମପୁରଠାରେ ସ୍ୱପରାୟଣାତା ଓ ବହୁବିଧ ଭିନ୍ନକ୍ଷମ (Autistic/Multiple Disabled) ପିଲାମାନଙ୍କ ନିମନ୍ତେ ଏକ ସ୍ୱତନ୍ତ୍ର ବିଦ୍ୟାଳୟ, ଛତ୍ରପୁର ଠାରେ ଭିନ୍ନକ୍ଷମ ଯୁବକଯୁବତୀମାନଙ୍କ ନିମନ୍ତେ ଏକ ଧନ୍ଦାମୂଳକ ତାଲିମକେନ୍ଦ୍ର ଓ ସାମିୟାପଲ୍ଲୀ ଠାରେ ଶାରୀରିକ ଭିନ୍ନକ୍ଷମ ଓ ମାନସିକ ଅନଗ୍ରସର ବ୍ୟକ୍ତିମାନଙ୍କ ନିମନ୍ତେ ଏକ ବୃଦ୍ଧାଶ୍ରମ ପ୍ରତିଷ୍ଠା କରାଯିବ ବୋଲି ମହାସଂଘର ସାଧାରଣ ସଂପାଦକ ଶ୍ରୀ ରାଓ ସୂଚନା ଦେଇଛନ୍ତି । ଏହି କାର୍ଯ୍ୟକ୍ରମରେ ୱାଇ. ୠକ୍ଷ୍ମୀ, କୋଷାଧ୍ୟକ୍ଷ ଡା.ସରୋଜିନୀ ସେଠୀ, ସମର୍ଥ ଆବାସିକ ବିଦ୍ୟାଳୟର ଅଧ୍ୟକ୍ଷା ଶର୍ମିଷ୍ଟା ମିଶ୍ର ଓ ମହାସଂଘର ଅନ୍ୟତମ ସଦସ୍ୟ ତଥା ସହକାରୀ ଶିକ୍ଷକ ଶଙ୍କର ମହାନ୍ତି ଅଂଶ ଗ୍ରହଣ କରିଥିଲେ ।
ରିପୋର୍ଟ : ଜିଲା ପ୍ରତିନିଧି ନିମାଇଁ ଚରଣ ପଣ୍ଡା
