ଜଳେଶ୍ୱର (ସମୃଦ୍ଧ ଓଡିଶା) ଜଳେଶ୍ୱର ବ୍ଲକ ଅନ୍ତର୍ଗତ ରାଇବଣିଆ ଥାନା ଅଧିନ ଦକ୍ଷିଣ ପ୍ରହରାଜପୁର ପଂଚାୟତର ପ୍ରାୟ ୫୦ରୁ ଉର୍ଦ୍ଧ୍ୱ ଯୁବକ ଦାଦନ ଖଟିବା ପାଇଁ କେରଳ ଯାଇଥିଲେ । ମାତ୍ର କରୋନା ମହାମାରୀ ପାଇଁ ଗତ ମାର୍ଚ୍ଚମାସ ୨୩ ତାରିଖ ଦିନ ସେମାନେ ନିଜ ଘର ଅଭିମୁଖେ ଆସିବାର କାର୍ଯ୍ୟକ୍ରମ ଥିଲା । କିନ୍ତୁ ଗତ ୨୨ତାରିଖ ଦିନ ସମଗ୍ର ଭାରତବର୍ଷରେ ଜନତାକଫ୍ୟୁ ଯୋଗୁଁ ସେମାନେ କେରଳରୁ ଆସି ଚେନ୍ନାଇରେ ପହଞ୍ଚିବା ପରେ ଟ୍ରେନ୍ ବନ୍ଦ ଯୋଗୁଁ ସେଠାରେ ଫସିରହିଛନ୍ତି । ଚେନ୍ନାଇ ନିକଟସ୍ଥ କାନ୍ନାଫରଫିଡଲ କମ୍ୟୁନିଟି ସେଷ୍ଟରରେ ସେମାନେ ଆଶ୍ରୟ ନେଇଛନ୍ତି । ଲକ୍ଡାଉନ୍ ଯୋଗୁଁ ସେମାନେ ବାହାରକୁ ବାହାରି ପାରୁ ନ ଥିବାରୁ ପାଖରେ ଥିବା ଟଙ୍କା ସରିଯାଇଥିବାରୁ ଭୋକରେ କାଳାତିପାତ କରୁଛନ୍ତି ବୋଲି ଖବର ମିଳୁଛି । ଆସନ୍ତା ୧୪ତାରିଖ ପର୍ଯ୍ୟନ୍ତ ଲକ୍ଡାଉନ୍ ବ୍ୟବସ୍ଥା ଯୋଗୁଁ ସେମାନଙ୍କ ଅବସ୍ଥା କଣ ହେବ ସେ ନେଇ ରାଜ୍ୟ ସରକାର ଓ ସମ୍ପୃକ୍ତ ଜିଲ୍ଲାପ୍ରଶାସନ ଚିନ୍ତା କରିବା ଉଚିତ ବୋଲି ବୁଦ୍ଧିଜୀବୀ ମାନେ ମତ ଦେବା ସହ ସେମାନଙ୍କୁ ତୁରନ୍ତ ଉଦ୍ଧାର କରାଯିବାକୁ ଓଡିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ବାଲେଶ୍ୱର ଜିଲାପ୍ରଶାସନ ନିକଟରେ ଗୁହାରୀ କରିବା ସଂଗେ ସଂଗେ ସେଠାରୁ ଫେରାଇ ଆଣିବା ପାଇଁ ନିବେଦନ କରିଛନ୍ତି ।
ରିପୋର୍ଟ : ଭୂପତି କୁମାର ପରିଡା
