ଜଳେଶ୍ୱର (ସମୃଦ୍ଧ ଓଡିଶା) ଜଳେଶ୍ୱର ବିଧାନସଭା ନିର୍ବାଚନମଣ୍ଡଳୀରେ ସ୍ୱାସ୍ଥ୍ୟସେବା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇ ପଡିଥିବା ବେଳେ ସ୍ଥାନୀୟ ବିଧାୟକଙ୍କ ଅପାରଗତା ଏଥିପାଇଁ ଦାୟୀ ବୋଲି କଂଗ୍ରେସ ମିଡିଆ ସେଲ୍ରରାଜ୍ୟ ପ୍ରବକ୍ତା ସୁଦର୍ଶନ ଦାସ ଅଭିଯୋଗ କରିଛନ୍ତି । ସ୍ଥାନୀୟ ପୂର୍ତ ବିଭାଗ ଡାକବଙ୍ଗଳା ଠାରେ ଶନିବାର ଦିନ କଂଗ୍ରେସ ଦଳ ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ଶ୍ରୀ ଦାସ ଜଳେଶ୍ୱର ବ୍ଲକର ଶିଖରପୁର, ରଣନାଥ, ନାମ୍ପୋ, ଖୁଆଡ, ପଶ୍ଚିମବାଡ, ଜମାଳପୁର, ଗୋପୀମୋହନ ପୁର, ଓଲମରା, ଶାଳବଣୀ, ଜଳେଶ୍ୱର, ଭେଲୋରା ଓ ସିଂଲା ଠାରେ ଥିବା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଡାକ୍ତର ନ ଥିବାବେଳେ ଫାର୍ମାସିଷ୍ଟ୍ ମାନଙ୍କ ହାତରେ ରୋଗୀମାନଙ୍କର ଭାଗ୍ୟକୁ ଟେକି ଦେଇଛନ୍ତି ବୋଲି କହିଥିଲେ । ହାତୀଗଡ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ୫ଜଣ ଡାକ୍ତର ପଦବୀ ରହିଥିବା ବେଳେ ମାତ୍ର ୩ଜଣ ଡାକ୍ତର ରହିଛନ୍ତି । ସେହିପରି ଜଳେଶ୍ୱର ଜି.କେ. ଭଟ୍ଟର ହସପିଟାଲରେ ୭ଜଣ ଡାକ୍ତର ଆବଶ୍ୟକ ଥିବାବେଳେ ମାତ୍ର ୩ଜଣ ଡାକ୍ତରଙ୍କ ଦ୍ୱାରା ରୋଗୀ ସେବା ଚାଲିଛି । ଏହି ହସ୍ପିଟାଲରେ ପ୍ରାଥମିକ ଚିକିତ୍ସା ପରେ ସମସ୍ତ ରୋଗୀଙ୍କୁ ବାଲେଶ୍ୱରକୁ ରେଫର କରାଯାଉଛି । ସମସ୍ତ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ତୁରନ୍ତ ଏମ.ବି.ବି.ଏସ୍ ଡାକ୍ତର ନିଯୁକ୍ତି କରିବା, ହାତୀଗଡ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଏବଂ ଜଳେଶ୍ୱର ଭଟ୍ଟର ହସ୍ପିଟାଲର ସମସ୍ତ ଡାକ୍ତର ଏବଂଷ୍ଟାଫ୍ ନର୍ସ ପଦବୀ ପୂରଣ କରା ନ ଗଲେ ଆଗାମୀ ଦିନରେ କଂଗ୍ରେସ ଦଳ ପକ୍ଷରୁ ବ୍ୟାପକ ଆନ୍ଦୋଳନ କରାଯିବ ବୋଲିସାମ୍ବାଦିକ ମାନଙ୍କୁ ସେ ସୂଚନା ଦେଇଥିଲେ । ଏହି ସାମ୍ବାଦିକ ସମ୍ମିଳନୀରେ କଂଗ୍ରେସ ନେତା ସେକ ଫରିଦ୍ ଅହମ୍ମଦ, ଗିରିଜା ଶଙ୍କର ଦାସ, ବିଜୟ ପ୍ରଧାନ, ସରପଂଚ ପଦ୍ମଲୋଚନ ବେହେରା, ଜଗଦୀଶ ନନ୍ଦୀ ଓ ରାଜୀବ ପରିଡା ପ୍ରମୁଖ ଉପସ୍ଥିତ ଥିଲେ ।
ରିପୋର୍ଟ : ଭୂପତି କୁମାର ପରିଡା
