ଗଞ୍ଜାମ (ସମୃଦ୍ଧ ଓଡିଶା) ଗଞ୍ଜାମ ଏନଏସି ଅନ୍ତର୍ଗତ ଦାମୋଦରପୁର ଗ୍ରାମର ମହିଳାମାନେ ପାନୀୟ ଜଳ ସମସ୍ୟାକୁ ନେଇ ଗରା ମାଠିଆ ଧରି ୧୬ ନମ୍ବର ଜାତୀୟ ରାଜପଥ ଅବରୋଧ କରାଯାଇଥିବା ସୂଚନା ମିଳିଛି । ଯାହାକୁ ନେଇ କିଛି ସମୟ ପାଇଁ ବ୍ରହ୍ମପୁର ପଟୁ ଭୁବନେଶ୍ୱର ଅଭିମୁଖେ ଯାଉଥିବା ଯାନ ବାହାନ ରାସ୍ତାରେ ଅଟକି ରହିଥିଲା । ସ୍ଥାନୀୟ ଥାନାରେ ଅଧିକାରୀ ସୁଦାମ ମଲିକ ପହଞ୍ଚି ମହିଳାମାନଙ୍କୁ ବୁଝାଇବା ଏବଂ ଜନସ୍ୱାସ୍ଥ୍ୟ ବିଭାଗୀୟ ଅଧିକାରୀଙ୍କ ସହ ଆଲୋଚନା ପରେ ମହିଳାମାନେ ରାସ୍ତା ଅବରୋଧରୁ ହଟିଥିଲେ । ସୁଚନା ଅନୁଯାୟୀ ୫ ଦିନ ହେଲା ୧୧ ନମ୍ବର ୱାର୍ଡର ଅନେକ ପରିବାର ପାନୀୟଜଳ ଆଦୌ ପାଉନଥିବା ବେଳେ ପୂର୍ବରୁ ବିଭିନ୍ନ ସମୟରେ ପାନୀୟଜଳ ସମସ୍ୟା ଜଟିଳ ହୋଇପଡୁଥିବା ଯୋଗୁଁ ଗ୍ରାମରେ ଘୋର ଅସନ୍ତୋଷ ପ୍ରକାଶ ପାଉଛି । ଏପରିକି ବିଭିନ୍ନ ସମୟରେ ଗ୍ରାମର ମହିଳାମାନେ ଏନ ଏ ସି କତ୍ତୃପକ୍ଷ, ଛତ୍ରପୁର ଜନସ୍ୱାସ୍ଥ୍ୟ କାର୍ଯ୍ୟାଳୟ ଦୌଡ଼ିଲେ ମଧ୍ୟ କୌଣସି ସୁଫଳ ମିଳିନଥିବା ଏହି ମହିଳାମାନେ ଅଭିଯୋଗ କରିଛନ୍ତି । ପ୍ରତିଶୃତି ଅନୁଯାୟୀ ଅପରାହ୍ନରେ ଜନସ୍ୱାସ୍ଥ୍ୟ ବିଭାଗ ଅଧିକାରୀ ରମେଶ ଚନ୍ଦ୍ର ପଟ୍ଟନାୟକ, ସ୍ଥାନୀୟ ଥାନାରେ ଅଧିକାରୀ ସିଡିଏମ ମଲିକ କନିଷ୍ଟ ଯନ୍ତ୍ରୀ ଆଶିଷ କୁମାର ବରାଳ ପହଞ୍ଚି ମହିଳାମାନଙ୍କ ସହ ଆଲୋଚନା କରିବା ସହ ସମସ୍ୟା ସମ୍ପର୍କରେ ପଚାରି ବୁଝିଥିଲେ । ଅପରାହ୍ନରେ ଜଳ ଛଡା ଯାଇଥିଲେ ମଧ୍ୟ ମଟର ବ୍ୟବହାର ଯୋଗୁଁ ଠିକ ଭାବେ ପାଣି ଆସିନଥିଲା । ଯାହାକୁ ନେଇ ବିଦ୍ୟୁତ ବିଛିନ୍ନ କରି ଜଳ ଛଡା ଯିବା ନିମନ୍ତେ ନିଷ୍ପତି ନେବା ପାଇଁ ବିଭାଗୀୟ ଅଧିକାରୀଙ୍କ ସହ ଆଲୋଚନା କରାଯାଇଥିଲା । ଅନ୍ୟ ପଟେ ଋଷିକୂଲ୍ୟା ନଦୀପଟରେ ରହିଥିବା ପ୍ରାୟ ୨୦ରୁ ଉର୍ଦ୍ଧ୍ୱ ପରିବାର ପାନୀୟଜଳ ପାଇପାରୁନଥିବା ଅଭିଯୋଗ କରିଥିଲେ । ଗ୍ରାମରେ ଦ୍ୱିତୀୟ ଜଳଭଣ୍ଡାର ନିର୍ମାଣ ହୋଇପାରିଲେ ଗ୍ରାମରେ ବାସ କରୁଥିବା ପ୍ରାୟ ୪୦୦ରୁ ଉର୍ଦ୍ଧ ପରିବାର ଠିକ ଭାବେ ପାନୀୟଜଳ ପାଇପାରିବେ ବୋଲି ମତ ପ୍ରକାଶ କରିଥିଲେ । ଯାହାକୁ ନେଇ ଗ୍ରାମବାସୀଙ୍କ ବୃହତ୍ତର ସ୍ୱାର୍ଥ ଦୃଷ୍ଟିରୁ ବିଭାଗୀୟ କତ୍ତୃପକ୍ଷ ଜନ ପ୍ରତିନିଧି ପଦକ୍ଷେପ ନେବାକୁ ଅଂଚଳବାସୀଙ୍କ ପକ୍ଷରୁ ଦାବି ହେଉଛି ।
ରିପୋର୍ଟ : ଜିଲ୍ଲା ସ୍ୱତନ୍ତ୍ର ପ୍ରତିନିଧି ନିମାଇଁ ଚରଣ ପଣ୍ଡା
