ଛତ୍ରପୁର (ସମୃଦ୍ଧ ଓଡିଶା) ଗଞ୍ଜାମ ଜିଲ୍ଲାର ଓଡ଼ିଆ ମାଧ୍ୟମ ବିଦ୍ୟାଳୟର ଛାତ୍ରଛାତ୍ରୀମାନଙ୍କ ଡିଜିଟାଲ ପାଠ ପଢା ପାଇଁ ମୋବାଇଲ ଆପ ‘ମଧୁ’ ନଭେମ୍ବର ୧୪ ରିଖ ଶିଶୁ ଦିବସ ଅବସରରେ ଶୁଭାରମ୍ଭ କରାଯିବାର କାର୍ଯ୍ୟକ୍ରମ ରହିଛି । ତେଣୁ ଏହାକୁ ନେଇ ଛତ୍ରପୁର ସ୍ଥିତ ସମଗ୍ର ଶିକ୍ଷା ଅଭିଯାନ ସମ୍ମିଳନୀ କକ୍ଷରେ ଜିଲ୍ଲାର ବଛା ବଛା ଶିକ୍ଷକ ଓ ଶିକ୍ଷୟତ୍ରୀଙ୍କୁ ନେଇ ରେକଡିଂ କାର୍ଯ୍ୟ ଚାଲିଥିବା ବେଳେ ଗତକାଲି ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ସେଠାକୁ ଯାଇ ସ୍ଥିତି ଅନୁଧ୍ୟାନ କରିଛନ୍ତି । ଜିଲ୍ଲାପାଳଙ୍କ ଉପସ୍ଥିତିରେ ଜଣେ ଶିକ୍ଷୟତ୍ରୀଙ୍କ ଗଣିତ ବିଷୟରେ ଶିକ୍ଷାଦାନର ଶୈଳୀକୁ ରେକଡ଼ିଂ କରାଯାଇଥିଲା । ଛାତ୍ରଛାତ୍ରୀଙ୍କୁ ପରୀକ୍ଷା ସମୟରେ ସହାୟକ ହେବା ଭଳି ବିଭିନ୍ନ ବିଷୟରେ ପ୍ରଶ୍ନର ଉତ୍ତରକୁ ଉକ୍ତ ଆପରେ ଅପଲୋଡ଼ କରିବା ପାଇଁ ଜିଲ୍ଲାପାଳ କହିଛନ୍ତି । ବିଶେଷ କରି ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ପାଇଁ ୫ ମାର୍କର ପ୍ରଶ୍ନ ଗୁଡିକର ଉତ୍ତର ଗୁଡିକୁ ଏହି ଆପରେ ଅପଲୋଡ଼ କରାଯିବ । ଯେଉଁ ଶିକ୍ଷକ ସମସ୍ତଙ୍କ ଠାରୁ ସରଳ ଓ ସଠିକ ଭାବେ ପ୍ରଶ୍ନ ଗୁଡିକର ଉତ୍ତର ରଖିପାରୁଥିବେ ସେଭଳି ଶିକ୍ଷକମାନଙ୍କ ଶିକ୍ଷା ଶୈଳୀକୁ ରେକଡିଂ କରି ଏହି ଆପରେ ଅପଲୋଡ଼ କରାଯାଉ ବୋଲି ଜିଲ୍ଲାପାଳ କହିଛନ୍ତି । ଅନ୍ୟମାନଙ୍କ ମଧ୍ୟରେ ଜିଲ୍ଲା ଶିକ୍ଷାଧିକାରୀ ଡ଼.ସନାତନ ପଣ୍ଡା, ରଙ୍ଗେଇଲୁଣ୍ଡା ବିଇଓ ଡ଼.ପ୍ରଭାତୀ ମହାପାତ୍ର, ସମଗ୍ର ଶିକ୍ଷା ଅଭିଯାନର ଅର୍ଥପରାମର୍ଶଦାତା ମଧୁସୂଦନ ପରିଡା, ଅନୁସୂଚିତ ଜାତି ଓ ଜନଜାତି ବିଭାଗର ଜିଲ୍ଲା ସଂଯୋଜକ ଡ଼.ସରୋଜ ମୋହନ ପାଳ ପ୍ରମୁଖ ଉପସ୍ଥିତ ରହିଥିଲେ ।
ରିପୋର୍ଟ : ଦକ୍ଷିଣାଞ୍ଚଳ ବ୍ୟୁରୋ ଚିଫ ନିମାଇଁ ଚରଣ ପଣ୍ଡା
