ଦିଗପହଣ୍ଡି/ପାଟପୁର (ସମୃଦ୍ଧ ଓଡିଶା) ଗଞ୍ଜାମ ଜିଲ୍ଲା ଦିଗପହଣ୍ଡି ଓ ପାଟପୁର ଥାନା ଅଧୀନରେ ଥିବା ଭୁଷୁଣ୍ଡା ଓ କଂସମାରୀ ଗ୍ରାମ ନିକଟରେ ଗତ ରବିବାର ଦିନ ପ୍ରାୟ ଅପରାହ୍ନ ସାଢେ଼ ୩ ଟାରେ ସଡକ ଦୁର୍ଘଟଣା ଘଟି ୫ ଜଣ ଗୁରୁତର ଆହତ ହୋଇଥିବା ଜଣାପଡିଛି । ଗୁରୁତର ମାନଙ୍କ ମଧ୍ୟରେ ପାଟପୁର ଥାନା ପୋଡାମାରୀ ଗ୍ରାମର ଅନ୍ତର୍ଯ୍ୟାମୀ ସାହୁ (୫୫), ବୁଲୁ ବାଡତ୍ୟା (୨୭), ସଂଜୀବ କୁମାର ପାତ୍ର ଓ ସିମାଞ୍ଚଳ ବେହେରା (୩୦) ଏବଂ ଖୋର୍ଦ୍ଧା ଅଞ୍ଚଳର ସତ୍ୟପ୍ରକାଶ ମହାନ୍ତି (୨୫) ବୋଲି ଜଣାପଡିଛି । ଖବରପ୍ରକାରେ, ପ୍ରଥମତଃ ପୋଡାମାରୀ ଗ୍ରାମର ସଂଜୀବ ଓ ସାଙ୍ଗ ରବିନ୍ଦ୍ର ବେହେରା ମିଶି ନିଜ ବାଇକ (ଓଡି୦୭ y ୩୪୩୦) ଓ ସିମାଞ୍ଚଳ ଏବଂ ବୁଲୁ ନିଜ ଗ୍ଳେମର ବାଇକ ଜରିଆରେ ମିଶି ନିକଟସ୍ଥ ଗ୍ରାମ ଡେଙ୍ଗାଓସ୍ଥାକୁ ବାଣ କିଣିବା ପାଇଁ ଆସୁଥିବା ସମୟରେ ଉକ୍ତ ଗ୍ରାମର ଅନ୍ତର୍ଯ୍ୟାମୀ ଆପାଚେ ବାଇକ (ଓଡି୦୭ ୟୁ ୪୬୯୨) ଯୋଗେ ନିଜ ଗ୍ରାମ ପୋଡାମାରୀ ଫେରୁଥିବାବେଳେ ସିମାଞ୍ଚଳଙ୍କ ଗାଡ଼ି ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା । ଏହାପରେ ପଛରେ ଆସୁଥିବା ସଂଜୀବ ମଧ୍ୟ ପଛପଟୁ ସିମାଞ୍ଚଳର ଗାଡ଼ିକୁ ବାଡେଇ ହୋଇଯାଇଥିଲେ । ସେହିପରି ଦିଗପହଣ୍ଡି ବ୍ଲକ ଭୂଷୁଣ୍ଡା ଗ୍ରାମ ନିକଟରେ ସତ୍ୟପ୍ରକାଶ ନାମକ ଜଣେ ଯୁବକ ନିଜ ବାଇକରୁ ଭାରସାମ୍ୟ ହରାଇ ତଳେ ପଡି ଆହତ ହୋଇଥିଲେ । ଘଟଣାପରେ ପୃଥକ ସ୍ଥାନରେ ସାନଖେମୁଣ୍ଡି ଦମକଳବାହିନ ଓ ୧୦୮ ଆମ୍ବୁଲାନ୍ସ ନିୟୋଜିତ ରହି ସମସ୍ତଙ୍କୁ ଗୁରୁତର ଅବସ୍ଥାରେ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଇଥିଲା । ପ୍ରାଥମିକ ଚିକିତ୍ସା ପରେ ଗୁରୁତର ଅନ୍ତର୍ଯ୍ୟାମୀ ଓ ବୁଲୁଙ୍କ ଅବସ୍ଥା ସଙ୍କଟାପନ୍ନ ଥିବାରୁ ବ୍ରହ୍ମପୁର ବଡମେଡିକାଲକୁ ପଠାଇ ଦିଆଯାଇଥିବା ଜଣାପଡିଛି ।
ରିପୋର୍ଟ : ଦକ୍ଷିଣାଞ୍ଚଳ ବ୍ୟୁରୋ ଚିଫ ନିମାଇଁ ଚରଣ ପଣ୍ଡା