ଥିରୁବନ୍ତପୁରମ(ସମୃଦ୍ଧଓଡିଶା) ଦୁଇ ଜଣ ଯୁବକ ଯୁବତୀ ପରସ୍ପରକୁ ଭଲ ପାଉଥିଲେ। କିନ୍ତୁ ବାହାଘର ଆଉ ଗୋଟିଏ ଯୁବକ ସହ ଠିକ ହୋଇଯିବାରୁ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କକୁ ଚ୍ଛିନ୍ନ କରିବାକୁ ନିଷ୍ପତ୍ତି ନେଇଥିଲେ ପ୍ରେମିକା । ଏଥିପାଇଁ ପ୍ରେମିକକୁ ଜୀବନରେ ମାରିଦେବାକୁ କରିଥିଲେ ଷଡ଼ଯନ୍ତ୍ର। ନିଜ ଠାରୁ ଗୋଟିଏ ବର୍ଷ ସାନ ଯୁବକକୁ ପ୍ରେମ କରୁଥିବା ପ୍ରେମିକା ଜଣଙ୍କ ବେଶ ଶ୍ରଦ୍ଧାରେ ଘରକୁ ଡାକିଥିଲେ ପ୍ରେମିକକୁ । ଏହାପରେ ତାଙ୍କୁ ଆୟୁର୍ବେଦିକ ପାନୀୟ ନାଁରେ ବିଷ ମିଶାଇ ପିଆଇ ଦେଇଥିଲେ। ବାସ୍ ୧୧ ଦିନ ଧରି ଜୀବନ ସହ ସଂଘର୍ଷ କରିବା ପରେ ଶେଷରେ ଆଖି ବୁଜିଥିଲେ ପ୍ରେମିକ। ପ୍ରେମିକଙ୍କୁ ନିର୍ମମ ଭାବେ ହତ୍ୟା କରିଥିବା ପ୍ରେମିକାଙ୍କୁ ଆଜି କୋର୍ଟ ଫାଶୀ ଦଣ୍ଡରେ ଦଣ୍ଡିତ କରିଛନ୍ତି। ମାତ୍ର ୨୪ ବର୍ଷ ବୟସରେ ଜଣେ ଯୁବତୀ ଫାଶୀ ଦଣ୍ଡରେ ଦଣ୍ଡିତ ହେବା ଭାରତରେ ପ୍ରଥମ ଘଟଣା ହୋଇଛି। ୨୦୨୨ରେ କେରଳ ୨୪ ବର୍ଷୀୟ ଗ୍ରୀଷ୍ମା ତାଙ୍କର ୨୩ ବର୍ଷୀୟ ପ୍ରେମିକ ଶାରୋନ ରାଜଙ୍କ ସହ ଗଢ଼ିଥିବା ପ୍ରେମକୁ ସବୁଦିନ ପାଇଁ ଶେଷ କରିବା ଉଦ୍ଦେଶ୍ୟରେ ହତ୍ୟା ଭଳି ଜଘନ୍ୟକାଣ୍ଡ ଭିଆଇଥିଲେ। କେରଳର ଗୋଟିଏ ସ୍ଥାନୀୟ କୋର୍ଟ ଗତ ସପ୍ତାହରେ ଗ୍ରୀଷ୍ମା ଓ ତାଙ୍କ ମାମୁଙ୍କୁ ହତ୍ୟା ମାମଲାରେ ଦୋଷୀ ସାବ୍ୟସ୍ତ କରିଥିଲେ। ଆଜି ଗ୍ରୀଷ୍ମାଙ୍କୁ ମୃତ୍ୟୁ ଦଣ୍ଡ ଓ ତାଙ୍କ ମାମୁଙ୍କୁ ୩ ବର୍ଷ ଜେଲ ଦଣ୍ଡରେ ଦଣ୍ଡିତ କରିଛନ୍ତି। ଗ୍ରୀଷ୍ମାଙ୍କୁ ମୃତ୍ୟୁଦଣ୍ଡ ଦେବା ବେଳେ କୋର୍ଟ ଦୋଷୀର ବୟସକୁ ଆଦୌ ବିଚାରକୁ ନେଇ ନଥିଲେ। କୋର୍ଟର ବିଚାରପତି ମାମଲାକୁ ବିରଳରୁ ଅତି ବରିଳ ବୋଲି ଅବିହିତ କରିଥିଲେ। ଗ୍ରୀଷ୍ମା ମୃତ୍ୟୁଦଣ୍ଡରୁ ବର୍ତ୍ତିବା ପାଇଁ ନିଜର ଶିକ୍ଷାଗତ ଯୋଗ୍ୟତା, ଅପରାଧିକ ପୃଷ୍ଟଭୂମି ଓ ବାପା ମା’ଙ୍କ ଏକମାତ୍ର ଝିଅ ହେବାର ଗୁହାରୀ ଲଗାଇଥିଲେ। ହେଲେ କୋର୍ଟଙ୍କ ଉପରେ ଏହାର କୌଣସି ପ୍ରଭାବ ପଡ଼ି ନଥିଲା।ସରକାରୀ ଓକିଲ ଡିଜିଟାଲ ଓ ବିଜ୍ଞାନଭିତ୍ତିକ ପ୍ରମାଣ ଉପସ୍ଥାପନ କରି ଗ୍ରୀଷ୍ମାଙ୍କୁ ମୃତ୍ୟୁଦଣ୍ଡ ଦେବାକୁ ଦାବି କରିଥିଲେ। କୋର୍ଟ ପ୍ରମାଣ ସବୁ ଯାଞ୍ଚ କରିବା ପରେ ଗ୍ରୀଷ୍ମଙ୍କୁ ଫାଶୀ ଦଣ୍ଡରେ ଦଣ୍ଡିତ କରିଛନ୍ତି।
