ଛତ୍ରପୁର (ସମୃଦ୍ଧ ଓଡିଶା) ଆସନ୍ତା ନିର୍ବାଚନରେ ଜିଲ୍ଲାର ସମସ୍ତ ଭୋଟର ଯେପରି ନିର୍ଭୁଲ ମତଦାନ କରିବେ ଏବଂ ଇ.ଭି.ଏମର ସଠିକ ବ୍ୟବହାର ସୁନିଶ୍ଚିତ କରିବା ପାଇଁ ଜିଲ୍ଲାରେ ନିର୍ବାଚନ ପାଠଶାଳା ଅନୁଷ୍ଠିତ ହେବ । ଫେବୃୟାରୀ ୧ ତାରିଖରୁ ୨୫ ତାରିଖ ପର୍ଯ୍ୟନ୍ତ ପାଠଶାଳା ଚାଲୁ ରହିବ । ପ୍ରତ୍ୟେକ ବୁଥ୍ ରେ ବୁଥ୍ ସ୍ତରୀୟ ଅଧିକରୀ ଏହାର ଆବାହକ ରହିବେ । ଅଙ୍ଗନୱାଡି କେନ୍ଦ୍ର କିମ୍ବା ନିକଟସ୍ଥ ସରକାରୀ ଘରେ ଏହି ପାଠଶାଳା ଅପରାହ୍ନ ୨ଘଣ୍ଟା ଠାରୁ ୫ଘଣ୍ଟା ପର୍ଯ୍ୟନ୍ତ କାର୍ଯ୍ୟ କରିବେ । ବୁଥ୍ ସ୍ତରରେ ଭୋଟର ସଚେତନତା କ୍ଲବ ଗଠନ ହେବ । ଭୋଟରମାନଙ୍କୁ ପାଠଶାଳା ପ୍ରତି ଆକୃଷ୍ଟ କରିବାକୁ ପାଠଶାଳା ମିତ୍ର ମନୋନୀତ କରାଯିବ । ୨୦୧୯ ସାଧାରଣ ନିର୍ବାଚନ ପରିପ୍ରେକ୍ଷୀରେ ଆଦର୍ଶ ବିଧି, ଭୋଟିଂ ମେସିନର ଶୁଦ୍ଧତା, ଭିଭିପ୍ୟାଟର କାର୍ଯ୍ୟକାରିତା ଏବଂ ନୋଟ ବିଷୟରେ ଅଧିକ ସୂଚନା ଦିଆଯିବ । ଯେଉଁ ଭୋଟରମାନଙ୍କ ନାମ ତାଲିକାରେ ନଥିବା ସେମାନେ ମଧ୍ୟ ଫର୍ମ ପୂରଣ କରି ସଂପୃକ୍ତ ବୁଥ୍ ସ୍ତରୀୟ ଅଧିକାରୀଙ୍କୁ ପ୍ରଦାନ କଲେ ତାହା ଉପଜିଲ୍ଲାପାଳଙ୍କ ସ୍ତରରେ ତାଲିକାରେ ସଂଯୋଗ ହେବ । ଯେଉଁ ମାନଙ୍କର ପୂର୍ବ ଭୋଟର ଅଭିଜ୍ଞତା ଥିବ ସେମାନେ ଏହି ଅବସରରେ ଲୋକଙ୍କୁ ଅବଗତ କରାଇବେ । ପ୍ରଶ୍ନୋତ୍ତର ମାଧ୍ୟମରେ ଭୋଟରମାନଙ୍କ ଶଂସୟ ଦୂର କରାଯିବ । ଦିବ୍ୟାଙ୍ଗ ଭୋଟର ମାନଙ୍କ ପାଇଁ କରାଯାଇଥିବା ସ୍ୱତନ୍ତ୍ର ବ୍ୟବସ୍ଥା ବିଷୟରେ ସୂଚନା ଦିଆଯିବ । ନିର୍ବାଚନ ସେକ୍ଟର ଅଧିକାରୀମାନେ ନିୟମିତ ଭାବରେ ନିର୍ବାଚନ ପାଠଶାଳା ପରିଦର୍ଶନ କରିବେ । ବ୍ଲକ ଶିକ୍ଷାଧିକାରୀମାନେ ସପ୍ତାହରେ ଦୁଇ ଦିନ ପାଠଶାଳା ପରିଦର୍ଶନ କରିବେ । ପାଠଶାଳାର ଭିଡିଓ ଏବଂ ଫୋଟୋ ଉତ୍ତୋଳନ କରାଯାଇ ଜିଲ୍ଲା ସ୍ତରକୁ ପ୍ରେରଣ କରାଯିବ । ଏହି ବୈଠକରେ ଅତିରିକ୍ତ ଜିଲ୍ଲାପାଳ କବିନ୍ଦ୍ର କୁମାର ସାହୁ ଅଧ୍ୟକ୍ଷତା କରିଥିଲେ । ଅନ୍ୟମାନଙ୍କ ମଧ୍ୟରେ ବ୍ରହ୍ମପୁର ଉପଜିଲ୍ଲାପାଳ ଦିଗନ୍ତ ରାଉତରାୟ, ଛତ୍ରପୁର ଉପଜିଲ୍ଲାପାଳ ଦେବବ୍ରତ ସାହୁ, ଭଞ୍ଜନଗର ଉପଜିଲ୍ଲାପାଳ ରାଜେନ୍ଦ୍ର କୁମାର ମିଞ୍ଜ, ବ୍ରହ୍ମପୁର ଉନ୍ନୟନ ସଂସ୍ଥା ସଚ୍ଚିବ ସମ୍ବିତ ରାଉତ, ଡେପୁଟି କଲେକ୍ଟର ନିର୍ବାଚନ ଡ଼ଃ. ବିଜୟାନନ୍ଦ ସେଠି, ବ୍ଲକ ଉନ୍ନୟନ ଅଧିକାରୀ ଓ ଅନ୍ୟାନ୍ୟ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ ।
ରିପୋର୍ଟ : ଜିଲ୍ଲା ସ୍ୱତନ୍ତ୍ର ପ୍ରତିନିଧି ନିମାଇଁ ଚରଣ ପଣ୍ଡା
