ବ୍ରହ୍ମପୁର (ସମୃଦ୍ଧ ଓଡିଶା) ବିଜେପିର ଟିକଟ ବଣ୍ଟନରେ ଅସନ୍ତୁଷ୍ଟ ହୋଇ ବରିଷ୍ଠ ନେତାଙ୍କୁ ଉପେକ୍ଷା କରାଯାଇଥିବାରୁ ଏହାର ପ୍ରତିବାଦ କରି ଗତକାଲି ବହୁ ବିଜେପି କର୍ମୀ ବିଜେଡ଼ିରେ ଯୋଗ ଦେଇଛନ୍ତି । ବିଜେପିର ଘୁମୁସର ଜିଲ୍ଲା କାର୍ଯ୍ୟକାରିଣୀ ସଦସ୍ୟ ତଥା ପୋଲସରା ବିଧାନସଭା ନିର୍ବାଚନ ମଣ୍ଡଳୀ ପ୍ରଭାରୀ ଅନୀଲ୍ କୁମାର ମହାପାତ୍ରଙ୍କ ନେତୃତ୍ୱରେ ୨୨ ଜଣ କର୍ମକର୍ତ୍ତା ବିଜେପିକୁ ଛାଡି ବିଜେଡ଼ିରେ ଯୋଗ ଦେଇଛନ୍ତି । ଦଳବଦଳ କରିଥିବା ଏହି କର୍ମକର୍ତ୍ତାମାନେ ପିତଳ ମଣ୍ଡଳ ବିଜେପିର ବିଭିନ୍ନ ପଦପଦବୀରେ ରହିଥିଲେ । ବିଜେଡ଼ି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନୀତି, ଆଦର୍ଶ ଓ ସର୍ବାଙ୍ଗୀନ ବିକାଶ ଦିଗରେ ବିଭିନ୍ନ କାର୍ଯ୍ୟକ୍ରମରେ ଅନୁପ୍ରାଣୀତ ହୋଇ ଏହି କର୍ମକର୍ତ୍ତାମାନେ ବିଜେଡ଼ି ଦଳରେ ଯୋଗା ଦେଇଥିବା ଏହି ଅବସରରେ କହିଛନ୍ତି । ଗଞ୍ଜାମ ଜିଲ୍ଲା ବିଜେଡ଼ି ସଭାପତି ତଥା ଗୋପାଳପୁର ବିଧାୟକ ଡ଼.ପ୍ରଦୀପ କୁମାର ପାଣିଗ୍ରାହୀଙ୍କ ଉପସ୍ଥିତିରେ ଏହି କର୍ମକର୍ତ୍ତାମାନେ ବିଜେଡ଼ିରେ ସାମିଲ୍ ହୋଇଥିଲେ । ଏହି କାର୍ଯ୍ୟକ୍ରମରେ ଜିଲ୍ଲା ବିଜେଡ଼ିର ବହୁ କର୍ମକର୍ତ୍ତା ଉପସ୍ଥିତ ଥିଲେ । ବିଜେଡ଼ିରେ ସାମିଲ୍ ହୋଇଥିବା କର୍ମକର୍ତ୍ତାଙ୍କ ମଧ୍ୟରେ ଅନୀଲ୍ କୁମାର ମହାପାତ୍ର, ଭିକା ବେହେରା, ରୁକୁଣି ବେହେରା, ସିମାଂଚଳ ମହାନ୍ତି, ଶୁକରାମ ବେହେରା, ଅମରେନ୍ଦ୍ର ମିଶ୍ର, କେ.ଗଣେଶ, ଅମର ସେଠୀ, ଭାବଗ୍ରାହୀ ପରିଡ଼ା, ଜି.ସୁମ୍ବେଶ୍ୱର ରାଓ ପ୍ରମୁଖ ୨୨ ଜଣ ରହିଛନ୍ତି । ଏ ସଂପର୍କରେ ବ୍ରହ୍ମପୁର କୋର୍ଟପେଟା ଛକ ସ୍ଥିତ ବିଜେଡ଼ି କାର୍ଯ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଜିଲ୍ଲା ବିଜେଡ଼ି ସଭାପତି ଡ଼.ପାଣିଗ୍ରାହୀ ସୂଚନା ଦେଇଛନ୍ତି ।
ରିପୋର୍ଟ : ଜିଲ୍ଲା ସ୍ୱତନ୍ତ୍ର ପ୍ରତିନିଧି ନିମାଇଁ ଚରଣ ପଣ୍ଡା
