ଛତ୍ରପୁର (ସମୃଦ୍ଧ ଓଡିଶା) ଗଞ୍ଜାମଜିଲ୍ଲା ଛତ୍ରପୁର ମିଶ୍ର କଲୋନୀରେ ରହୁଥିବା ଜଣେ ବିଧବାଙ୍କ ଘରେ ସୁନ୍ଦରପୁର ଗ୍ରାମ ମଣ୍ଡଳ ସାହିର ସନ୍ତୋଷ ନାହାକ ନାମକ ଜଣେ ଯୁବକଙ୍କ ଝୁଲନ୍ତା ଶବ ଉଦ୍ଧାର ହୋଇଛି । ଏହି ଘଟଣାର ସୂଚନା ପାଇ ଛତ୍ରପୁର ଥାନା ପୋଲିସ ଘଟଣା ସ୍ଥଳରେ ପହଞ୍ଚି ଶବକୁ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ଏକ ଅପମୃତ୍ୟୁ ମାମଲା ରୁଜୁ କରିଛି । ଖବର ମିଳିଛି ଯେ ଆଉ ଦୁଇ ଦିନ ଥିଲା ସନ୍ତୋଷଙ୍କ ବାହାଘର । ଅନ୍ୟପକ୍ଷରେ ତାଙ୍କ ପରିବାର ପକ୍ଷରୁ ସନ୍ତୋଷ ଆତ୍ମହତ୍ୟା କରି ନାହିଁ ତାଙ୍କୁ କେହି ହତ୍ୟା କରିଛି ବୋଲି ଅଭିଯୋଗ କରିଛନ୍ତି । ଆସନ୍ତା ୧୩ ତାରିଖରେ ସନ୍ତୋଷଙ୍କ ବାହାଘର ସ୍ଥିର ହୋଇଥିଲା ଏହାପରେ ମଧ୍ୟରାତ୍ରିରେ ସନ୍ତୋଷଙ୍କ ଡାକି ହତ୍ୟା କରି ଆତ୍ମହତ୍ୟାର ରୂପ ଦିଆଯାଇଛି ବୋଲି ସନ୍ତୋଷଙ୍କ ଭାଇ ଥାନାରେ ଅଭିଯୋଗ କରିଛନ୍ତି ବୋଲି ସୂଚନା ମିଳିଛି । ଏହି ଅଭିଯୋଗ ଆଧାରରେ ଛତ୍ରପୁର ଥାନା ପୋଲିସ ତଦନ୍ତ ଜାରି ରଖିଛି । ପୋଲିସ କହିବା ଅନୁଯାୟୀ ବିଧବା ଜଣକ ଛତ୍ରପୁର ସହର ବାସିନ୍ଦା ଓ ସେ ସୁନ୍ଦରପୁରରେ ବିବାହ କରିଥିଲେ । ସ୍ୱାମୀଙ୍କ ମୃତ୍ୟୁ ପରେ ତାଙ୍କୁ ସନ୍ତୋଷ ହିଁ ଆଣି ଛତ୍ରପୁର ମିଶ୍ର କଲୋନୀର ଏକ ଭଡ଼ାଘରେ ରଖିଥିଲେ । ସନ୍ତୋଷ ପ୍ରାୟ ଏହାକୁ ଯିବା ଆସିବା କରୁଥିଲେ । ସେ ଗତକାଲି ମଧ୍ୟ ଆସିଥିଲେ ରାତି ପ୍ରାୟ ୩ ଟା ସମୟରେ ଝାଡା ଯିବି କହି ପ୍ଲାଷ୍ଟିକ ଦୌଡିରେ ଫାଶ ଲଗାଇ ଝୁଲି ପଡିଥିଲେ ବୋଲି ପ୍ରାଥମିକ ତଦନ୍ତରୁ ଜଣାପଡିଥିବା ପୋଲିସ ସୂଚନା ଦେଇଛି ।
ରିପୋର୍ଟ : ଜିଲ୍ଲା ସ୍ୱତନ୍ତ୍ର ପ୍ରତିନିଧି ନିମାଇଁ ଚରଣ ପଣ୍ଡା
