ଭଞ୍ଜନଗର/ଜଗନ୍ନାଥପ୍ରସାଦ (ସମୃଦ୍ଧ ଓଡିଶା) ଜଗନ୍ନାଥ ପ୍ରସାଦ ବ୍ଲକ ଅନ୍ତର୍ଗତ କାଦୁଆ ପଞ୍ଚାୟତର ଝାଡ଼ସାହି ଠାରେ ଜଳଯୋଗାଣ କାର୍ଯ୍ୟ ଚାଲୁ ଥିବା ବେଳେ ରାସ୍ତା ଉପରେ ଯାଇଥିବା ବିଦ୍ୟୁତ ତାରରେ ଲୁହା ପାଇପ ବାଜି ଖଦାଳ ଗୌଡ଼(୪୫) ନାମକ ଜଣେ ଶ୍ରମିକର ମୃତ୍ୟୁ ଘଟିଛି । ମିଳିଥିବା ସୂଚନା ମୁତାବକ ଝାଡ଼ସାହିରେ ଜଳଯୋଗାଣ କାର୍ଯ୍ୟ ଚାଲୁଥିବା ସମୟରେ ଶ୍ରମିକ ଖଦାଳ ଗୌଡ଼ ଲୁହା ପାଇପକୁ ଉପରକୁ ଉଠେଇଦେବାରୁ ଉପରେ ପଟେ ଯାଇଥିବା ବିଦ୍ୟୁତ ତାରରେ ସଂଯୋଗ ହୋଇ ଆଘାତ ଲାଗିଥିଲା ଫଳରେ ଘଟଣା ସ୍ଥଳରେ ସେ ଟଳି ପଡ଼ିଥିଲେ । ସ୍ତାନୀୟ ଶ୍ରମିକ ମାନେ ପ୍ରଥମେ ୧୦୮କୁ କଲ କରିଥିଲେ, ସେ ନ ଆସିବାରୁ ଦମକଳ ଗାଡି ଯାଇ ଗୁରୁତର ଖଦାଳକୁ ଜଗନ୍ନାଥ ପ୍ରସାଦ ମେଡିକାଲକୁ ଆଣିଥିଲେ । ହେଲେ ସେଠାରେ ଡାକ୍ତର ଖଦାଳଙ୍କୁ କିଛି ସମୟ ପରେ ମୃତ୍ୟୁ ଘୋଷଣା କରିଥିଲେ । ଖଦାଳଙ୍କ ଘର ଭଞ୍ଜନଗର ବ୍ଳକ ମଳାସପଦର ଗ୍ରାମର ବୋଲି ଜଣା ଯାଇଛି । ଅପରପକ୍ଷରେ ପୋଲିସ ପହଞ୍ଚି ଘଟଣାର ତଦନ୍ତ ଜାରି ରଖିଛି ।
ରିପୋର୍ଟ : ନିଲୁ ବିଷୋୟୀ
