ବେଗୁନିଆପଡ଼ା (ସମୃଦ୍ଧ ଓଡିଶା) ଗଞ୍ଜାମ ଜିଲ୍ଲା ବେଗୁନିଆପଡ଼ା ଫାଣ୍ଡି ଅନ୍ତର୍ଗତ ବୁରୁଝରୀ ଠାରେ ଜଣେ ମହିଳାଙ୍କୁ ଅତି ନିର୍ମମ ଭାବେ ହତ୍ୟା ଘଟଣା ଚାଂଚଲ୍ୟ ସୃଷ୍ଟି କରିଛି । ଗତରାତିରେ ମହିଳା ଜଣକ ଘରେ ଥିବା ସମୟରେ ଏକାଧିକ ବ୍ୟକ୍ତି ଘରେ ପଶି ତାଙ୍କୁ ହତ୍ୟା କରିଥିବା ସନ୍ଦେହ କରାଯାଉଛି । ପୋଲିସ୍ ଘଟଣାସ୍ଥଳରେ ପହଂଚି ଶବକୁ ଜବତ କରି ବ୍ୟବଚ୍ଛେଦ ପାଇଁ ପଠାଇ ଘଟଣାର ତଦନ୍ତ ଚଳାଇଥିବା ଜଣାପଡ଼ିଛି । ତେବେ ମହିଳାଙ୍କୁ କିଏ ହତ୍ୟା କଲା ଏବଂ କାହିଁକି ତାହା ଅସ୍ପଷ୍ଟ ରହିଛି । ଅନ୍ୟପକ୍ଷରେ ଘଟଣାକୁ ନେଇ ଅଂଚଳରେ ଉତେଜନା ଲାଗିରହିଛି । ପ୍ରାପ୍ତ ସୂଚନା ମୁତାବକ ବୁରୁଝରୀ ଗ୍ରାମର ବିଶ୍ୱନାଥ ନାୟକଙ୍କ ପତ୍ନୀ ବିଜୟଲକ୍ଷ୍ମୀ ପୁଅ ଝିଅଙ୍କୁ ନେଇ ଏଠାରେ ଏକା ରହୁଥିବା ବେଳେ ସ୍ୱାମୀ ବିଦେଶରେ ରହି କାର୍ଯ୍ୟ କରୁଛନ୍ତି । ପୁଅ ଓ ଝିଅ ଗତକାଲି ସଂପର୍କିୟଙ୍କ ଘର ବେଲପଡ଼ାକୁ ଯାତ୍ରା ଦେଖିବା ପାଇଁ ଯାଇଥିଲେ । ଆଜି ସକାଳେ ସାହି ପଡ଼ୋଶୀ ଲୋକେ ଡ଼ାକିବା ସମୟରେ ନଶୁଣିବାରୁ ଲୋକେ ସନ୍ଦେହରେ ଦେଖିବା ସମୟରେ ଛାତ ଉପର ଆଜବେଷ୍ଟର୍ସ ଖୋଲାଥିବା ଦେଖିବାକୁ ପାଇଥିଲେ । ଏସଂପର୍କରେ ପୋଲିସ୍ ଖବର ପାଇ କୋଦଳା ଓ ବେଗୁନିଆପଡ଼ା ପୋଲିସ୍ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଛନ୍ତି । ମହିଳାଙ୍କ ପାଟିରେ କପଡ଼ା ବନ୍ଧାଯାଇଥିବା ବେଳେ ଘଟଣାସ୍ଥଳରେ ପୁରୁଷୋତମପୁର ଏସଡ଼ିପିଓ ନିମାଉଁ ଚରଣ ସେଠୀ,କୋଦଳା ଥାନା ଅଧିକାରୀ ଦିଲ୍ଲୀପ କୁମାର ସାହୁ,ବେଗୁନିଆପଡ଼ା ଫାଣ୍ଡି ଅଧିକାରୀ ଦୀପ୍ତି ରଞ୍ଜନ ବେହେରା ଓ ସାଇଂଟିଫିକ୍ ଟିମ୍ ପହଂଚି ଅଧିକ ତଦନ୍ତ ଚଳାଇଥିବା ଜଣାପଡ଼ିଛି ।
ରିପୋର୍ଟ : ଜିଲ୍ଲା ସ୍ୱତନ୍ତ୍ର ପ୍ରତିନିଧି ନିମାଇଁ ଚରଣ ପଣ୍ଡା