ପାରଳାଖେମୁଣ୍ଡି (ସମୃଦ୍ଧ ଓଡିଶା) ଗଜପତି ଜିଲ୍ଲା ରାୟଗଡର ଭାରତମାତା କୃଷକ ସଂଘ ପକ୍ଷରୁ ଜିଲ୍ଲାପାଳଙ୍କ ଜରିଆରେ ଗତ ତିତିଲି ବାତ୍ୟାରେ କ୍ଷତିଗ୍ରସ୍ତ ହୋଇଥିବା କ୍ଷୟକ୍ଷତିର ଭରଣ ପାଇଁ ରାଜ୍ୟପାଳଙ୍କୁ ଦାବିପତ୍ର ଦିଆଯାଇଛି । ସେମାନେ ଜଣାଇଛନ୍ତି ଯେ, ଅଜକୁ ବାତ୍ୟା ହେବାର ୧୧ ଦିନ ପୁରଣ ହୋଇଯାଇଥିଲେ ମଧ୍ୟ ସରକାରୀ ରିଲିଫ ପହଞ୍ଚି ପାରିନାହିଁ କିମ୍ବା ଅଦ୍ୟାବଧି କୌଣସି ସରକାରୀ କର୍ମଚାରୀଙ୍କର ଏଠାରେ ପାଦ ପଡ଼ିନାହିଁ । ରାୟଗଡ ବ୍ଲକ ଜିଲ୍ଲାରେ ସର୍ବାଧିକ କ୍ଷତିଗ୍ରସ୍ତ ହୋଇଛି । ଧାନ ଫସଲ, କପା, କାନ୍ଦୁଲ, କାଜୁ, ମାଣ୍ଡିଆ, କାଙ୍ଗୁ, ବଜାରା, ଜନା, ମକ୍କା ଆଦି ଫସଲ ନଷ୍ଟ ହୋଇଥିବା ବେଳେ ବାଇଗଣ ଟମାଟ ଆଦି ପନିପରିବା ଫସଲ ସମ୍ପୂର୍ଣ ଧ୍ୱଂସ ହୋଇଯାଇଛି । ରାୟଗଡ ବ୍ଲକର ଆମ୍ବ, ନଡ଼ିଆ, ପଣସ, କଦଳୀ, ବିରି, ମୁଗ, ଶାଗୁଆନ ଗଛ ଆଦି ବାତ୍ୟାରେ ଧ୍ୱଂସ ହୋଇଯାଇଥିବା ବେଳେ ଅଧିକାଂଶ ଜନବସତି ବାସହରା ହୋଇଛନ୍ତି । ଗୃହପାଳିତ ପଶୁପକ୍ଷୀଙ୍କ କ୍ଷୟକ୍ଷତି ହିସାବ କଲେ ନାହିଁନଥିବା କ୍ଷତି ଘଟିଛି । ଏସବୁ ଦୃଷ୍ଟିରୁ ସରକାରୀ କର୍ମଚାରୀମାନେ ଏଠାରେ ଆକଳନ ପାଇଁ ଆସୁନଥିବାରୁ ଲୋକେ ଅସନ୍ତୋଷ ପ୍ରକାଶ କରୁଛନ୍ତି । ବାତ୍ୟା ଓ ବନ୍ୟାରେ କ୍ଷତିଗ୍ରସ୍ତ ରାୟଗଡ଼ ବ୍ଲକର କ୍ଷତି ଭରଣ ପାଇଁ ଉପଯୁକ୍ତ ଭାବେ ଆକଳନ କରି ରିପୋର୍ଟ ପ୍ରସ୍ତୁତ କରିବାକୁ ସଂଘ ପକ୍ଷରୁ ଦାବି ହୋଇଛି । ଗତକାଲି ଏହି ସଂଘ ଏକ ବିରାଟ ଶୋଭାଯାତ୍ରାରେ ପାରଳାଖେମୁଣ୍ଡି ସହରରେ ପରିକ୍ରମା କରି ଜିଲ୍ଲାପାଳଙ୍କ କାର୍ଯ୍ୟାଳୟକୁ ଯାଇଥିଲେ । ରାଜ୍ୟପାଲଙ୍କ ଉଦ୍ଧେଶ୍ୟରେ ଜିଲ୍ଲାପାଳଙ୍କୁ ସେମାନେ ଏହି ସଂପର୍କରେ ଗତକାଲି ଦାବିପତ୍ର ପ୍ରଦାନ କରିଛନ୍ତି ।