ଛତ୍ରପୁର (ସମୃଦ୍ଧ ଓଡିଶା) ଅବକାରୀ ନିୟମ (As per clause 44 of Excise rules)ଅନୁସାରେ ମଦଦୋକାନ ଗୁଡିକ ଆପତ୍ତିବିହୀନ ସ୍ଥାନ ଗୁଡିକରେ ଖୋଲିବା ନିୟମ ଥିବା ବେଳେ ତାହା ଖୋଲମ୍ ଖୋଲା ଉଲଘଂନ କରାଯାଉଛି ଦେଖିବାକୁ ମିଳୁଛି । ବ୍ରହ୍ମପୁର ଅବକାରୀ ଜିଲ୍ଲାରେ ଚାଲୁଥିବା କେତେକ ମଦଦୋକାନଗୁଡିକ ସ୍କୁଲ, କଲେଜ, ସପିଙ୍ଗ୍ ମହଲ, ମନ୍ଦିର, ଔଷଧ ଦୋକାନ ଓ ଜନବସତି ଠାରୁ ସଠିକ ଦୂରତାରେ ନଥିବା ଦ୍ୱାରା ଜନସାଧାରଣଙ୍କ ଉପରେ କୂପ୍ରଭାବ ପଡୁଛି । ଦେଖାଯାଉଛି ଯେ ସାହି ତଥା ଜନବସତି ଅଞ୍ଚଳ ଗୁଡିକରେ ମଦଦୋକାନ ଚାଲିବା ଦ୍ୱାରା ଝିଅ/ସ୍ତ୍ରୀ ଲୋକମାନଙ୍କ ଚଳପ୍ରଚଳରେ ବାଧା ସୃଷ୍ଟି ହୋଉଛି । ମଦ ପିଇବା ପାଇଁ ଆସୁଥିବା ବ୍ୟକ୍ତିମାନେ କମେଣ୍ଟ୍ ମାରିବା, ସାହି ମଝିରେ ଗାଡ଼ି ର୍ପାକିଙ୍ଗ୍ କରିବା, ରାସ୍ତା ଉପରେ ମଦ ପିଇ ହାଲ୍ଲାଗୁଲ୍ଲା କରିବା ଇତ୍ୟାଦି ଦେଖିବାକୁ ମିଳୁଛି । ସାହି ଗୁଡିକ ଓ ଜନବସତି ଅଞ୍ଚଳରେ ମଦଦୋକାନ ପାଇଁ ଲାଇସେନ୍ସ ପ୍ରଦାନ କରିବା କେତେ ଦୂର ଯଥାର୍ଥତା ତାହା ଦାୟିତ୍ୱରେ ଥିବା ଅନୁମତି ପ୍ରଦାନକାରୀ ଅଫିସର ହୄଦୟଙ୍ଗମ କଲେ ଜନସାଧାରଣ ଉପକୄତ ହୋଇପାରିଥାନ୍ତେ । ଅନୁମତି ପ୍ରଦାନକାରୀ ଅଫିସର ନିଜ ପରିବାରର ସୁରକ୍ଷା ଯେପରି ନିତାନ୍ତ ଆବଶ୍ୟକ ମଣୁଛନ୍ତି ସେହିପରି ରାଜ୍ୟ ଓ ବ୍ରହ୍ମପୁର ନଗରବାସୀଙ୍କ ପାଇଁ ସେପରି ସୁରକ୍ଷା ମଣିବା ନିତାନ୍ତ ଜରୁରୀ । ବ୍ରହ୍ମପୁର ସହରରେ ଥିବା ଠିପିବନ୍ଦ ମଦଦୋକାନ ଗୁଡିକ ଠିପିଖୋଲା ମଦଦୋକାନର ଭଳି କାର୍ଯ୍ୟ କରିବା ପରିଲିକ୍ଷତ ହେଉଛି କିନ୍ତୁ ପ୍ରଶାସନ ଜାଣିଶୁଣି ଚୁପ୍ ରହୁଛନ୍ତି । ଜିଲ୍ଲା ପରିବହନ ବିଭାଗର ର୍ସଭେ ରିପୋର୍ଟ ଅନୁଯାୟୀ ଜଣା ପଡିଲା ଯେ ପ୍ରତିବର୍ଷ ଗଞ୍ଜାମ ଜିଲ୍ଲା ମୋଟର ଦୁର୍ଘଟଣାରେ ପ୍ରଥମ ସ୍ଥାନ ଅଧିକାର କରିଆସୁଅଛି କିନ୍ତୁ ସେଥିରୁ ଅଧିକାଂଶ ଗାଡିଚାଳକ ମଦପିଇ ଦୁର୍ଘଟଣାମାନ ଘଟାଉଥିବା ଜଣାପଡିଛି । ମଦଦୋକାନ ଖୋଲିବା ପୂର୍ବରୁ ଦାୟିତ୍ୱରେ ଥିବା ଏରିଆ ତଦନ୍ତକାରୀ ଅଫିସର ମିଥ୍ୟା ରିପୋର୍ଟ ଦେଇ ଲାଇସେନ୍ସ ପ୍ରଦାନ କରିବା ନିୟମାବଳୀରୁ ସ୍ପଷ୍ଟ ପ୍ରମାଣିତ ହେଉଅଛି ଓ ବଟି ନେଇ ଲାଇସେନ୍ସ ପ୍ରଦାନ କରିବା ସନ୍ଦେହ କରାଯାଉଛି । ଓଡିଶା ସରକାରଙ୍କ ଅଡିଟ୍ ବିଭାଗର ତଦାରଖ ରିପୋର୍ଟରୁ ଜଣା ପଡୁଅଛି ଯେ କୋଟି କୋଟି ଟଙ୍କାର ଦୁର୍ନୀତିର ପଦ୍ଦାଫାସ୍ ହୋଇଛି । ମଦଦୋକାନ ଥିବା ସ୍ଥାନମାନଙ୍କରେ ଝିଅ, ବୋହୁ ଓ ମାଁ ମାନେ କେତେଦୁର ସୁରକ୍ଷିତ ଜିଲ୍ଲା ପ୍ରଶାସନ ଚିନ୍ତାକରିବା ଏବଂ ବୁଝିବା ଉଚିତ ବୋଲି ଅଭିଯୋଗ ହୋଇଛି ।
ରିପୋର୍ଟ : ଜିଲ୍ଲା ସ୍ୱତନ୍ତ୍ର ପ୍ରତିନିଧି ନିମାଇଁ ଚରଣ ପଣ୍ଡା
