ଜଳେଶ୍ୱର (ସମୃଦ୍ଧ ଓଡିଶା) ୬୦ନଂ ଜାତୀୟ ରାଜପଥରେ ଜିଟି ରେଷ୍ଟରେଣ୍ଟ ସନ୍ନିକଟସ୍ଥ ମାଛଗାଡିରୁ ମାଛଚୋରୀ ହୋଇଥିବା ଘଟଣାରେ ଜଳେଶ୍ୱର ପୂର୍ବତନ ବିଧାୟକ ପୁତ୍ରଙ୍କ ସଂପୃକ୍ତି ନାହିଁବୋଲି ଆଜି ସଂନ୍ଧ୍ୟାରେ ଏକ ସାମ୍ବାଦିକ ସମ୍ମିଳନୀରେ ସେ ପ୍ରକାଶ କରିଛନ୍ତି । ଘଟଣାରୁ ପ୍ରକାଶ ଗତ ୮ତାରିଖ ବିଳମ୍ବିତ ରାତିରେ କେନ୍ଦ୍ରାପଡାରୁ କୋଲକତା ଅଭିମୁଖେ ଯାଉଥିବା ପିକ୍ଅପ୍ ଓଡି୦୧ଟି-୧୭୫୧ରୁ ମାଛଚୋରୀ ଓ ପରେ ଲୁଟ ହୋଇଥିବା ଥାନାରେ ଅଭିଯୋଗ ହୋଇଥିଲା । ଏ ସଂପର୍କରେ ୧୯୦/୧୯ ରେ ଏକ ମାମଲା ରୁଜୁ ହୋଇଛି । ଏଥିରେ ୧୬ଜଣ ବ୍ୟକ୍ତି ସଂପୃକ୍ତ ଥିବାର ପୁଲିସ୍ ସୂତ୍ରରୁ ପ୍ରକାଶ । ଉକ୍ତ ରାତିରେ ପୁଲିସ୍ ଉପରୋକ୍ତ ପିକ୍ଅପ୍ ଓ ଲୁଟେରା ମାନଙ୍କ ପକ୍ଷରୁ ବ୍ୟବହୃତ ହୋଇଥିବା ବୋଲେରକୁ ପୁଲିସ୍ ଅଟକ ରଖିଛି । ଏହି ଘଟଣାରେ ଜଳେଶ୍ୱର ପୂର୍ବତନ ବିଧାୟକ ଜୟନାରାୟଣ ମହାନ୍ତିଙ୍କ ପୁତ୍ର ଦିବ୍ୟକାମ ମହାନ୍ତି ଓରଫ ଜିତେନ୍ ସଂପୃକ୍ତ ଥିବାର କେତେକ ଗଣମାଧ୍ୟମରେ ପ୍ରକାଶ ପାଇଥିଲା । ଏ ସଂପର୍କରେ ଆଜି ସନ୍ଧ୍ୟାରେ ବିଜେପି କାର୍ଯ୍ୟାଳୟ ପରିସରରେ ଆୟୋଜିତ ସାମ୍ବାଦିକ ସମ୍ମିଳନୀରେ ସେ ସଂପୃକ୍ତ ନ ଥିବାର ଦୃଢକ୍ତି ପ୍ରକାଶ କରିଛନ୍ତି । ଏହା ପ୍ରକାଶ ପାଇଥିବାରୁ ଦିବ୍ୟକାମ ମହାନ୍ତି ଓ ତାଙ୍କ ବାପା ପୂର୍ବତନ ବିଧାୟକ ଜୟନାରାୟଣ ମହାନ୍ତିଙ୍କ ସମ୍ମାନରେ ଆଞ୍ଚ ଆସିଥିବା ସେ ପ୍ରକାଶ କରିଛନ୍ତି । ତେଣୁ ସେ ଏହା ବିରୋଧରେ ଆଇନ୍ର ଆଶ୍ରୟ ନେଇ ମାନହାନି କେସ୍ କରିବେ ବୋଲି ସାମ୍ବାଦିକ ସମ୍ମିଳନୀରେ ପ୍ରକାଶ କରିଥିଲେ । ଏହି ସାମ୍ବାଦିକ ସମ୍ମିଳନିରେ ପୂର୍ବତନ ବ୍ଲକ ଅଧ୍ୟକ୍ଷ ଅଭିଜିତ୍ ପ୍ରଧାନ, ପୂର୍ବତନ ଜିଲାପରିଷଦ ସଦସ୍ୟ ଶାନ୍ତୁନୁ ପଟ୍ଟନାୟକ ଉପସ୍ଥିତ ଥିଲେ । ଏ ସଂପର୍କରେ ଜଳେଶ୍ୱର ଥାନା ଆଇଆଇସି ପ୍ରଦୀପ କୁମାର ମାଝୀଙ୍କୁ ପଚାରିବାରୁ ସେ ଏହି ମାଛଚୋରୀ ମୋକର୍ଦ୍ଦମାରେ ବିଧାୟକଙ୍କ ପୁତ୍ରଙ୍କ ସଂପୃକ୍ତି ନାହିଁବୋଲି ପ୍ରକାଶ କରିଥିଲେ ।
ରିପୋର୍ଟ : ଭୂପତି କୁମାର ପରିଡା