ବ୍ରହ୍ମପୁର (ସମୃଦ୍ଧ ଓଡିଶା) ଆଜି ଜିଲ୍ଲାପାଳଙ୍କ ସମ୍ମିଳନୀ କକ୍ଷରେ ଗଞ୍ଜାମ ଜିଲ୍ଲାପାଳ ଶ୍ରୀ ବିଜୟ ଅମୃତ କୁଲାଙ୍ଗେଙ୍କ ଅଧ୍ୟକ୍ଷତାରେ ଜିଲ୍ଲାରେ ନିର୍ବାଚନ ପ୍ରସ୍ତୁତି ସମ୍ବନ୍ଧୀୟ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି । ଅନ୍ୟମାନଙ୍କ ମଧ୍ୟରେ ଏହି ସାମ୍ବାଦିକ ସମ୍ମିଳନୀରେ ଅତିରିକ୍ତ ଜିଲ୍ଲାପାଳ(ସାଧାରଣ) କବିନ୍ଦ୍ର କୁମାର ସାହୁ ଓ ଅତିରିକ୍ତ ଜିଲ୍ଲାପାଳ (ରାଜସ୍ୱ) ଲକ୍ଷ୍ମୀକାନ୍ତ ସେଠୀ ଉପସ୍ଥିତ ଥିଲେ । ଜିଲ୍ଲାପାଳ ଶ୍ରୀ କୁଲାଙ୍ଗେ ସାମ୍ବାଦିକମାନଙ୍କୁ ସୂଚନା ଦେଇଛନ୍ତି ଯେ ଜିଲ୍ଲାର ସମସ୍ତ ୩୦୬୩ ବୁଥରେ ଦିବ୍ୟାଙ୍ଗମାନଙ୍କ ଚାଲିବା ପାଇଁ ରାମ୍ପ, ପାଇଖାନା, ବିଜୁଳି ସଂଯୋଗ, ପିଇବା ପାଣି ଭଳି ନିଶ୍ଚିତ ସର୍ବନିମ୍ନ ବ୍ୟବସ୍ଥା କରାଯାଇଛି । ୧୦ଟି ସ୍ଥାନରେ ମଡେଲ ପୋଲିଂ ବୁଥ ଓ ପ୍ରତ୍ୟେକ ବିଧାନ ସଭା ଆସନ ପାଇଁ ଗୋଟିଏ ପିଙ୍କ ବୁଥର ବ୍ୟବସ୍ଥା କରାଯାଇଛି, ଯେଉଁଠାରେ କେବଳ ମହିଳା ନିର୍ବାଚନ କର୍ମଚାରୀ ହିଁ ରହିବେ । ଜିଲ୍ଲାପାଳ ସୂଚନା ଦେଇଥିଲେ ଯେ, ଆଜି ପର୍ଯ୍ୟନ୍ତ ୬୧,୨୨୦ ଜଣ ନୂତନ ଭୋଟର ଚୂଡାନ୍ତ ଭୋଟର ତାଲିକାରେ ସ୍ଥାନ ପାଇଛନ୍ତି । ଚୂଡାନ୍ତ ଭୋଟର ତାଲିକାର ୪୮୮୪୭ ଜଣ ଦିବ୍ୟାଙ୍ଗ ଅଛନ୍ତି ।ଏହି ନିର୍ବାଚନରେ ବୈଷୟିକ ଜ୍ଞାନ କୌଶଳର ବ୍ୟାପକ ପ୍ରୟୋଗ କରାଯାଇଛି । C-Vigil ଓ ନିର୍ବାଚନ ଅଚରନବିଧିକୁ କଡାକଡି ଲାଗୁ କରାଯାଇଛି । ୭୮ ଟି ପ୍ଲାଇଂ ସ୍କ୍ୱାର୍ଡ ଓ ଷ୍ଟାଟିକ୍ ସର୍ଭେଲାନ୍ସ ଟିମ ଗଠନ କରାଯାଇଛି । C-Vigil ମାଧ୍ୟମରେ ଯେଉଁ ୬ଟି ନିର୍ବାଚନ ଆଚରଣ ବିଧିର ଆରୋପ ଆସିଥିଲା, ତାହାର ସମାଧାନ କରାଯାଇସାରିଛି । ଏହାଛଡା ପ୍ରତ୍ୟେକ ବିଧାନସଭା କ୍ଷେତ୍ରରେ ହୋଡିଂ/ବ୍ୟାନର ହଟାଇବା ପାଇଁ ବ୍ୟାପକ ବ୍ୟବସ୍ଥା ନିଆଯାଇଛି । ଆଇନଶୃଙ୍ଖଳା ପରିସ୍ଥିତି ବିଷୟରେ ଜିଲ୍ଲାପାଳ ସୂଚନା ଦେଇ କହିଥିଲେ ଯେ, ଗଞ୍ଜାମ ଜିଲ୍ଲା ପୋଲିସ ତରଫରୁ ସଭା ଓ ରୋଷଣୀକୁ ନିୟନ୍ତ୍ରଣ କରିବା ପାଇଁ ଧାରା ୩୦ ଲାଗୁ କରାଯାଇଛି । ସାରା ଜିଲ୍ଲାର ଅବକାରୀ ବିଭାଗ, ରାଜସ୍ୱ ବିଭାଗ ଓ ପୋଲିସ ବିଭାଗର ମିଳିତ ସହଯୋଗରେ ଅବକାରୀ ଚଢ଼ାଉ କରାଯାଇଛି । ନିର୍ବାଚନରେ ପୋଲିସ ଓ ମାଜିଷ୍ଟ୍ରେଟମାନଙ୍କର ସମନ୍ୱୟ ପାଇଁ ଆସନ୍ତା ୧୬ ମାର୍ଚ୍ଚ ୨୦୧୯ ତଥା ଆସନ୍ତା କାଲି ଏକ ବୈଠକର ଆୟୋଜନ କରାଯାଇଛି ବୋଲି ଜିଲ୍ଲାପାଳରେ ସୂଚନା ଦେଇଛନ୍ତି । ନିର୍ବାଚନ ଅଧିକାରୀମାନଙ୍କର ପ୍ରଥମ ପର୍ଯ୍ୟାୟର ପ୍ରଶିକ୍ଷଣ ସମାପ୍ତ ହୋଇଛି ଓ ଆସନ୍ତା ମାର୍ଚ୍ଚ ୨୩ ରୁ ୨୭ ପର୍ଯ୍ୟନ୍ତ ଦ୍ଵିତୀୟ ପର୍ଯ୍ୟାୟର ପ୍ରଶିକ୍ଷଣ ହେବ ବୋଲି ସୂଚନା ଦିଆଯାଇଛି । ସେକ୍ଟର ଅଫିସର, ଫ୍ଲାଇଂ ସ୍କ୍ୱାର୍ଡ ଓ ଷ୍ଟାଟିକ ସର୍ଭେୟାନ୍ସ ଟିମର ପ୍ରଶିକ୍ଷଣ ମଧ୍ୟ ସମାପ୍ତ ହୋଇଛି । ଜିଲ୍ଲାପାଳ ସୂଚନା ଦେଇଥିଲେ ଦ୍ଵିତୀୟ ପର୍ଯ୍ୟାୟର ଇଭିଏମ/ଭିଭିପ୍ୟାଟ ସଚେତନତା କାର୍ଯ୍ୟକ୍ରମ ଆସନ୍ତା ୨୬ ପର୍ଯ୍ୟନ୍ତ ଭୋଟର ମାନଙ୍କ ମଧ୍ୟରେ ଆସ୍ଥା ଓ ବିଶ୍ୱାସ ଜନ୍ମାଇବା ପାଇଁ ପ୍ରତ୍ୟେକ ବ୍ଲକରେ ଚଳିବ । ଆସନ୍ତା କାଲିଠାରୁ ଇଭିଏମ ମେସିନ ଗୁଡିକର ରାଣ୍ଡୋମାଇଜେସନ ଆରମ୍ଭ ହେବ ବୋଲି ସୂଚନା ଦିଆଯାଇଅଛି । ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀଙ୍କ ନେତୃତ୍ୱରେ ମିଡ଼ିଆ ସାର୍ଟିଫିକେସନ ଆଣ୍ଡ ମନିଟରିଂ କମିଟି (ଏମସିଏମସି) ଗଠନ କରାଯାଇଛି ଯାହା ରାଜନୈତିକ ବିଜ୍ଞାପନ ଗୁଡିକୁ ଅନୁମୋଦନ କରିବ ତଥା ପେଡ ନ୍ୟୁଜ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଜିଲ୍ଲା ସୂଚନା ଓ ଲୋକ ସମ୍ପର୍କ କାର୍ଯ୍ୟାଳୟର ସୂଚନାର ପ୍ରସାରଣ ପାଇଁ ଏକ ମିଡ଼ିଆ ସେଲ ମଧ୍ୟ ଗଠନ କରାଯାଇଛି ବୋଲି ଜିଲ୍ଲାପାଳ ଶ୍ରୀ କୁଲାଙ୍ଗେ ପ୍ରକାଶ କରିଛନ୍ତି ।
ରିପୋର୍ଟ : ଜିଲ୍ଲା ସ୍ୱତନ୍ତ୍ର ପ୍ରତିନିଧି ନିମାଇଁ ଚରଣ ପଣ୍ଡା