ହିଞ୍ଜିଳିକାଟୁ (ସମୃଦ୍ଧ ଓଡିଶା) ହିଞ୍ଜିଳିକାଟୁ ପୌରାଞ୍ଚଳର ଦୈନିକ ଖବର କାଗଜ ସମାଜର ସାମ୍ବାଦିକ ପ୍ରିୟଦର୍ଶୀ ପଟ୍ଟନାୟକଙ୍କ ୪୭ ବର୍ଷ ବୟସରେ ଶନିବାର ପୂର୍ବାହ୍ନରେ ଭୁବନେଶ୍ୱରସ୍ଥିତ ଏକ ଘରେଇ ହସ୍ପିଟାଲରେ ପରଲୋକ ଘଟିଯାଇଛି । ସୂଚନା ଅନୁଯାୟୀ ତାଙ୍କର ପ୍ରାୟ୧୨ ଦିନ ତଳେ ଜ୍ଵର ହେବାରୁ ସ୍ୱାବ ଟେଷ୍ଟ କରାଯାଇଥିଲା । ପରୀକ୍ଷାରେ ନମୁନା ପଜିଟିଭ୍ ଆସିବା ପରେ ତାଙ୍କୁ ପ୍ରଥମେ ସ୍ଥାନୀୟ କୋଭିଡ୍ କେୟାର ସେଣ୍ଟର୍ ରେ ଭର୍ତ୍ତି କରାଯାଇଥିଲା । ଏହାପରେ ବ୍ରହ୍ମପୁର ଶୀତଳାପଲ୍ଲୀ କୋଭିଡ୍ ହସ୍ପିଟାଲ ପରେ ସ୍ୱାସ୍ଥ୍ୟରେ ଉନ୍ନତି ନ ଆସିବାରୁ ଭୁବନେଶ୍ୱର କିମ୍ସ କୋଭିଡ୍ କେୟାରରେ ଭର୍ତ୍ତି କରାଯାଇ ଚିକିତ୍ସା କରାଯାଉଥିଲା । ଗତ ୭ଦିନ ଧରି ସେ ଭେଣ୍ଟିଲେଟରରେ ଥିଲେ ବୋଲି ତାଙ୍କର ପରିବାର ସୂତ୍ରରୁ ପ୍ରକାଶ ପାଇଛି । ଏହାକୁ ନେଇ ସାରା ଅଞ୍ଚଳରେ ଶୋକର ଛାୟା ଖେଳି ଯାଇଛି । ବର୍ତ୍ତମାନ ପର୍ଯ୍ୟନ୍ତ ଜିଲ୍ଲା ପ୍ରଶାସନ କିମ୍ବା ରାଜ୍ୟ ସ୍ୱାସ୍ଥ୍ୟ ବିଭାଗ ପକ୍ଷରୁ କୌଣସି ସ୍ପଷ୍ଟ ସୂଚନା ମିଳିପାରି ନାହିଁ । ଦୀର୍ଘ ବର୍ଷ ଧରି ସେ ହିଞ୍ଜିଳିକାଟୁ ଅଞ୍ଚଳରେ ସାମ୍ବାଦିକ, ସମାଜସେବୀ ପରୋପକାରୀ, ମିଷ୍ଟଭାଷୀ ଭାବେ ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ବେଳେ ସ୍ଥାନୀୟ ସହରର ବିଭିନ୍ନ ଅନୁଷ୍ଠାନ ସହ ଜଡ଼ିତ ଥିବା ସହ ସେ ସମସ୍ତଙ୍କ ପାଖରେ ଅତି ପ୍ରିୟଭାଜନ ଥିଲେ । ସାମ୍ବାଦିକ ପ୍ରିୟଦର୍ଶୀ ପଟ୍ଟନାୟକଙ୍କ ମୃତ୍ୟୁରେ ସମୃଦ୍ଧ ଓଡିଶା ପରିବାର ତରଫରୁ ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରିଯିବା ସହ ତାଙ୍କ ଅମର ଆତ୍ମାର ସଦଗତି ନିମନ୍ତେ କାମନା କରାଯାଇଛି ।
ରିପୋର୍ଟ : ଜିଲ୍ଲା ପ୍ରତିନିଧି ନିମାଇଁ ଚରଣ ପଣ୍ଡା