ବ୍ରହ୍ମପୁର(ନିମାଇଁ ଚରଣ ପଣ୍ଡା )ରାଜ୍ୟରେ ଜନନୀ ସୁରକ୍ଷା ପାଇଁ କୋଟି କୋଟି ଟଙ୍କା ଖର୍ଛ ହେଉଥିଲେ ମଧ୍ୟ ଥମୁନି ଜନନୀ ଯନ୍ତ୍ରଣା। ଗାଁକୁ ରାସ୍ତା ନଥିବାରୁ ୧୫ କିଲୋମିଟର ଟୋକେଇରେ ବୁହା ହୋଇ ଆସିଲେ ପ୍ରସୂତି। ଏଭଳି ଚିତ୍ର ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ପାତ୍ରପୁର ବ୍ଲକ୍ ବାଦୁଆ ଗାଁରେ।ଏହି ଗାଁର ରବିନ୍ଦ୍ର ନାୟକଙ୍କ ପତ୍ନୀ ହୀରାମଣି ଗତକାଲି ସକାଳେ ପ୍ରସବ ଯନ୍ତ୍ରଣା ଅନୁଭବ କରିଥିଲେ। ଏହାପରେ ସେ ଏକ ପୁତ୍ର ସନ୍ତାନ ଜନ୍ମ କରିଥିଲେ। ହେଲେ ଏହି ଛୁଆଟି ଅର୍ଦ୍ଧ ପ୍ରସବ ଅବସ୍ଥାରେ ରହିଥିଲା।ଏହା ଦେଖି ଗାଁ ଲୋକେ ହୀରାମଣିଙ୍କୁ ଡାକ୍ତରଖାନା ନେବା କଥା ଚିନ୍ତା କରିଥିଲେ। ତେବେ ଗାଁକୁ ରାସ୍ତା ନଥିବାରୁ ଗାଡ଼ି କିମ୍ବା ଆମ୍ବୁଲାନ୍ସ ଆସିବାର ସମ୍ଭାବନା ନଥିଲା। ତେଣୁ ଲୋକେ ଟୋକେଇରେ ଦୋଳା କରି ମହିଳାଙ୍କୁ ୧୫ କିଲୋମିଟର ରାସ୍ତା ତଳବୁରାଢ଼ାଲ ପର୍ଯ୍ୟନ୍ତ ଆଣିଥିଲେ।ସେଠାରୁ ସରକାରୀ ଗାଡ଼ିରେ ମହିଳାଙ୍କୁ ପାତ୍ରପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ମହିଳାଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ଥିବାରୁ ତାଙ୍କୁ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଥିବା ଖବର ମିଳିଛି ।
