ଜଳେଶ୍ୱର (ସମୃଦ୍ଧ ଓଡିଶା) ଆଜି ସଂଧ୍ୟାରେ ୬୦ନଂ ଜାତୀୟ ରାଜପଥର ନନ୍ଦିକା ବାଇପାସ୍ଠାରେ ଏକ ଅଜଣା ଗାଡି ଧକ୍କାରେ ଜନୈକ ବାଇକ୍ ଆରୋହୀଙ୍କର ମୃତ୍ୟୁ ଘଟିଥିବାର ଜଣାଯାଇଛି । ଘଟଣାରୁ ପ୍ରକାଶ ଦକ୍ଷିଣ ପ୍ରହରାଜପୁର ପଂଚାୟତର ପ୍ରହରାଜପୁର ଗ୍ରାମର ପ୍ରତାପ ଘୋଷ (୫୪)ଙ୍କର ଏକ ତେଜରାତି ଦୋକାନ ଗାଁରେ ଥିବା ବେଳେ ଜଳେଶ୍ୱରର ବିଭିନ୍ନ ଅଂଚଳରେ ସେ ଗୁଆ ବ୍ୟବସାୟ କରିଥାନ୍ତି । ଆଜି ମଧ୍ୟ ଗୁଆଧରି ସେ ରାଜଘାଟ ପର୍ଯ୍ୟନ୍ତ ଯାଇ ତେଜରାତି ଦୋକାନରେ ଗୁଆଦେଇ ଫେରୁଥିଲେ । କିନ୍ତୁ ନନ୍ଦିକା ବାଇପାସ୍ ନିକଟରେ କୌଣସି ଏକ ଯାନ ଦ୍ରୁତ ଗତିରେ ଗଲାବେଳେ ଗୁଆ ବ୍ୟବସାୟୀ ପ୍ରତାପ ଘୋଷକୁ ଧକ୍କା ଦେଇଥିଲା । ଘଟଣାସ୍ଥଳରେ ପ୍ରତାପ ପଡିରହିଥିବା ବେଳେ ଗାଡିଟି ଖସି ପଳାଇବାରେ ସକ୍ଷମ ହୋଇଛି । ସ୍ଥାନୀୟ କେତେକ ଯୁବକ ପ୍ରତାପକୁ ଧରି ଜିକେଭଟ୍ଟର ହସ୍ପିଟାଲରେ ପହଞ୍ଚିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିବାରୁ ପୋଲିସ୍ ଏକ ମାମଲା ରୁଜୁକରି ତଦନ୍ତ ଚଳାଇଛି । ପ୍ରତାପଙ୍କର ଦୁଇ ପୁଅ ଓ ବିଧବା ସ୍ତ୍ରୀ ଅଛନ୍ତି । ଦୁର୍ଘଟଣାରେ ପ୍ରତାପଙ୍କ ମୃତ୍ୟୁ ଘଟିଥିବାରୁ ସହାୟତା ଯୋଗାଇ ଦେବାକୁ ସରପଞ୍ଚ ସତ୍ୟବ୍ରତ ଦାସ ଦାବି କରିଛନ୍ତି ।
ରିପୋର୍ଟ : ଭୂପତି ପରିଡା