ବ୍ରହ୍ମପୁର (ସମୃଦ୍ଧ ଓଡିଶା) ଗତକାଲି ଆର୍ଯ୍ୟପଲ୍ଲୀ ପଞ୍ଚାୟତର ୫ଶହରୁ ଉର୍ଦ୍ଧ ଲୋକେ ନେତାଜୀ ଛକ ଠାରୁ ଏକ ଶୋଭାଯାତ୍ରାରେ ବାହାରି ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚି ଜିଲ୍ଲାପାଳ କବିନ୍ଦ୍ର କୁମାର ସାହୁଙ୍କୁ ଏକ ଲିଖିତ ସ୍ମାରକ ପତ୍ର ପ୍ରଦାନ କରିଛନ୍ତି । ସୂଚନା ଯେ, ୧୯୯୯ ମସିହା ମହାବାତ୍ୟାକୁ ଦୃଷ୍ଟିରେ ରଖି ରାଜ୍ୟ ସରକାର ଭାରତ ଇଲେକ୍ଟ୍ରିକାଲ ଲିମିଟେଡ଼(ବେଲ) କମ୍ପାନୀ ଜରିଆରେ ପ୍ରାୟ ୫ ଶହରୁ ଅଧିକ ଘର ନିର୍ମାଣ କରି ଆର୍ଯ୍ୟପାଲ୍ଲୀ ପଞ୍ଚାୟତର ନିହାତି ଗରିବ ଲୋକଙ୍କୁ ପ୍ରଦାନ କରାଯାଇଥିଲା । ଆର୍ଯ୍ୟପାଲ୍ଲୀ ସମୁଦ୍ର ଉପକୂଳ ଅଞ୍ଚଳ ହୋଇଥିବାରୁ ଗୃହଗୁଡିକର ଅବଧି ପ୍ରାୟ ୧୦ ରୁ ୧୨ ବର୍ଷ ହୋଇଥାଏ । କିନ୍ତୁ ଗୃହ ଗୁଡିକୁ ଲୋକଙ୍କୁ ହସ୍ତାନ୍ତର ହେବାର ଦୀର୍ଘ ୨୦ ବର୍ଷ ବିତିଯାଇଛି । ବର୍ତ୍ତମାନ ସେହି ଗୃହ ଗୁଡିକ ଏବେ ଅବସ୍ଥା କହିଲେ ନ ସରେ । ଘରର ଛାତ ଭୁଶୁଡି ଖଣ୍ଡ ଖଣ୍ଡ ପଡୁଥିବା ଥିବାବେଳେ କେତେକ ଘର ଗୁଡିକ ସଂପୂର୍ଣ୍ଣ ନଷ୍ଟ ହେବାକୁ ଗଲାଣି । ପ୍ରାକୃତିକ ବିପର୍ଯ୍ୟୟ ବନ୍ୟା ଓ ବାତ୍ୟା ଆସିଲେ ଆର୍ଯ୍ୟପାଲ୍ଲୀ ପଞ୍ଚାୟତ ବହୁ କ୍ଷତିଗ୍ରସ୍ତ ହେଉଛି । ଏଣୁ ଉକ୍ତ ଘର ଗୁଡିକୁ ପକ୍କା ଭାବେ ପୁନଃ ନିର୍ମାଣ କରିବା ନଚେତ ନୂତନ ଗୃହ ଯୋଗାଇବା ପାଇଁ ଜିଲ୍ଲା ପ୍ରଶାସନ ଠାରେ ସଂପୃକ୍ତ ପରିବାର ଦାବି କରିଛନ୍ତି । ଆର୍ଯ୍ୟପାଲ୍ଲୀ ସରପଞ୍ଚ ଏମ.ଲକ୍ଷ୍ମୀ, ଓଡିଶା ମତ୍ସ୍ୟଜିବି ନେତା ଏମ.ଗୁଲାମୀ ଏବଂ ନ୍ୟାୟ ସରପଂଚ ପି.ବାବାଜୀଙ୍କ ନେତୃତ୍ୱରେ ୫ଶହରୁ ଉର୍ଦ୍ଧ ମହିଳା ଓ ପୁରୁଷମାନେ ଜିଲ୍ଲା ପ୍ରଶାସନର ଦ୍ୱାରସ୍ଥ ହୋଇ ଜିଲ୍ଲାପାଳଙ୍କ ଅନୁପସ୍ଥିତିରେ ଗଞ୍ଜାମ ଜିଲ୍ଲାପାଳ (ସାଧାରଣ) କବିନ୍ଦ୍ର କୁମାର ସାହୁଙ୍କୁ ଏକ ଲିଖିତ ସ୍ମାରକ ପତ୍ର ପ୍ରଦାନ କରିଥିଲେ । ଏଥିରେ ମତ୍ସ୍ୟଜିବି ନେତା ବି.ସୀମାଦ୍ରୀ, ବି.ଭୀମ, ପି.ରାମବାବୁ, କେ.ଦାଶରଥି, ଭଦ୍ରବ୍ୟକ୍ତି ପି.ମାଧେୟା, ଏନ.ନାନେୟା, ଏନ.ସନ୍ୟାସୀ, ବି.ଏରେୟା, ବି.ଚନ୍ଦ୍ରୟା, ବି.ଶଙ୍କରଙ୍କ ସମେତ ଶତାଧିକ ମତ୍ସ୍ୟଜୀବୀମାନେ ଅଂଶ ଗ୍ରହଣ କରିଥିଲେ ।
ରିପୋର୍ଟ : ଜିଲ୍ଲା ସ୍ୱତନ୍ତ୍ର ପ୍ରତିନିଧି ନିମାଇଁ ଚରଣ ପଣ୍ଡା