ବ୍ରହ୍ମପୁର (ସମୃଦ୍ଧ ଓଡିଶା) ବ୍ରହ୍ମପୁର ମହାନଗର ନିଗମ ପକ୍ଷରୁ ଗତ ୨ଦିନ ତଳେ ସ୍ୱାୟତ୍ତ ଶାସନ ଦିବସ ମହାସମାରୋହରେ ପାଳନ କରାଯାଇଥିବା ବେଳେ ଏହି କାର୍ଯ୍ୟାକ୍ରମରେ ଜିଲ୍ଲାପାଳଙ୍କ ସମେତ ବିଏମସି କମିଶନର, ନିର୍ବାଚିତ ସାଂସଦ ଓ ବିଧାୟକ ଯୋଗ ଦେଇଥିଲେ । କିନ୍ତୁ ଏହି ଉତ୍ସବରେ ହାତଗଣତି କିଛି ମୁଷ୍ଟିମେୟ ବିଜେଡ଼ି ଦଳର ନେତା ଓ କର୍ମୀଙ୍କୁ ଛାଡ଼ି ଦେଲେ ସହରର କୌଣସି ବୁଦ୍ଧିଜିବୀ, ଶିକ୍ଷକ, ଆଇନଜୀବୀ, ସାମ୍ବାଦିକ, ପୂର୍ବରୁ ନିର୍ବାଚିତ ହୋଇଥିବା ପୌର ପ୍ରତିନିଧ କିମ୍ବା କୌଣସି ରାଜନୈତିକ ଦଳର ବ୍ୟକ୍ତି ବିଶେଷଙ୍କୁ ନ ଡ଼ାକି ଏହି ଉତ୍ସବ ପାଳନ କରିବାର ଉଦ୍ଦେଶ୍ୟ କ’ଣ ବୋଲି ଗଞ୍ଜାମ ଜିଲ୍ଲା କଂଗ୍ରେସ ପ୍ରଶ୍ନ କରିଛି । ବ୍ରହ୍ମପୁର ମହାନଗର ନିଗମ କାହାର ପୈତୃକ ସମ୍ପତ୍ତି ନୁହେଁ । ସରକାର ଆଜି ଅଛି କାଲି ଯିବ, ବିଜେଡ଼ି କହିଲେ ସରକାର ନାହିଁ କି ସରକାର କହିଲେ ବିଜେଡ଼ି ନାହିଁ । କିନ୍ତୁ ପ୍ରଶାସନ ଏକ ନିର୍ଦ୍ଦିଷ୍ଟ ଦଳର ବୋଲକରା ସାଜି କୌଣସି ଦଳକୁ ନିମନ୍ତ୍ରଣ ନ କରିବାରୁ ସ୍ପଷ୍ଟ ପ୍ରମାଣିତ ହେଉଛି ଯେ କିଛି ପ୍ରଶାସନିକ ଅଧିକାରୀ ସାମ୍ବିଧାନିକ ମାନ-ମର୍ଯ୍ୟଦାକୁ ଭୁଲିଯାଇ ଦଳୀୟ କାର୍ଯ୍ୟରେ ବ୍ୟସ୍ତ ରହୁଛନ୍ତି । ଯାହାକି ଗଣତନ୍ତ୍ର ପାଇଁ ଶୁଭଙ୍କର ନୁହେଁ । ମହାନଗର ନିଗମ କର୍ତ୍ତୃପକ୍ଷ ନିରପେକ୍ଷ ଭାବରେ କାମ କରୁ ଆମେ ତାକୁ ସ୍ୱାଗତ କରିବୁ । କିନ୍ତୁ କର୍ତ୍ତୃପକ୍ଷ ଜାଣିବା ଉଚିତ ଯେ ପୌରସଂସ୍ଥା ଲୋକଙ୍କର, ଲୋକଙ୍କର ଝାଳବୁହା ଟଙ୍କାରେ ଏହା ଗତିଶୀଳ । ଏଣୁ ଏକ ନିର୍ଦ୍ଦିଷ୍ଟ ରାଜନୈତିକ ଦଳକୁ ଧରି କାର୍ଯ୍ୟକ୍ରମ କଲେ ଆଗାମୀ ଦିନରେ ମହାନଗର ନିଗମକୁ ଘେରାଉ କରାଯାଇ ଅଚଳ କରାଯିବ ବୋଲି ଜିଲ୍ଲା କଂଗ୍ରେସ ସଭାପତି ତ୍ରିନାଥ ବେହେରା ଓ କାର୍ଯ୍ୟକାରୀ ସଭାପତି ପୀତବାସ ପଣ୍ଡା ଏକ ପ୍ରେସ୍ ବିଜ୍ଞପ୍ତିରେ ଜଣାଇଛନ୍ତି ।
ରିପୋର୍ଟ : ଜିଲ୍ଲା ପ୍ରତିନିଧି ନିମାଇଁ ଚରଣ ପଣ୍ଡା