ଦିଗପହଣ୍ଡି (ସମୃଦ୍ଧ ଓଡିଶା) ଆଜି ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଲକ ଅନ୍ତର୍ଗତ କୁଶପଡା ପଞ୍ଚାୟତର କେଦାରପୁର ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟରେ ବିଶ୍ଵ ପରିବେଶ ଦିବସ ଅବସରରେ ବିଦ୍ୟାଳୟ ପରିସରରେ ବୃକ୍ଷରୋପଣ କରାଯିବା ସହିତ ମିଶନ ଶକ୍ତି କୋଭିଡ-୧୯ ସ୍ୱୟଂସିଦ୍ଧା ଗୋଷ୍ଠୀମାନଙ୍କୁ କରୋନା ସଚେତନତା ଉପରେ ତାଲିମ ଶିବିର କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏନେଇ କାର୍ଯ୍ୟକ୍ରମରେ ବିଦ୍ୟାଳୟର ପ୍ରଧାନ ଶିକ୍ଷକ ଗୋପିନାଥ ପଟ୍ଟନାୟକ ସଭାପତିତ୍ବରେ ଏକ ସଭା ଅନୁଷ୍ଠିତ କରାଯାଇଥିଲା । ଏହି କାର୍ଯ୍ୟକ୍ରମରେ ମୁଖ୍ୟ ଅତିଥୀ ଭାବେ ଦିଗପହଣ୍ଡି ଗୋଷ୍ଠୀ ଶିକ୍ଷାଧିକାରୀ ବସନ୍ତ କୁମାର ପଣ୍ଡା ଓ ବ୍ଲକ ଉପଧ୍ଯକ୍ଷା ପ୍ରତିନିଧି ଶ୍ରୀ ଏମ.ନିରଞ୍ଜନ ରେଡ୍ଡି ଯୋଗ ଦେଇଥିଲେ । ସେହିପରି ଶିକ୍ଷକ ଏଲ୍. କୃଷ୍ଣମୁର୍ତ୍ତୀ ଦୋରା, ରାମଚନ୍ଦ୍ର ସେଠୀ, ପି.କୁନା ଦୋରା, ପ୍ରଭାକର ଘଡେଇ, ସୁଶାନ୍ତ ସାହୁ, ବିରଣୀ ସାହୁ ପ୍ରମୁଖ ସମ୍ମାନୀୟ ଅତିଥି ରୂପେ ମଞ୍ଚାସୀନ ରହିଥିଲେ । ଆଜିର ଏହି ପବିତ୍ର ଦିବସରେ ଅତିଥି ବୃନ୍ଦ ଓ ପ୍ରଧାନଶିକ୍ଷକ ଶ୍ରୀ ପଟ୍ଟନାୟକ ବିଦ୍ୟାଳୟ ପରିସରକୁ ସଫାସୁତୁରା ଓ ପରିବେଶକୁ ସବୁଜ ବନାନୀ କରିବା ନିମନ୍ତେ କିଛି ଗଛ ଲଗାଇ ଏକ ମହତ୍ତ୍ୱପୂର୍ଣ୍ଣ କାର୍ଯ୍ୟ କରିଛନ୍ତି । ଏଥିସହ ପୃଥିବୀର ତାପାୟନ, ପଲିଥିନ ମୁକ୍ତ, ପରିବେଶ ଓ ପରିମଳ ମୁକ୍ତ ଏବଂ ଚାରାରୋପଣ ଉପରେ ଆୟୋଜିତ ସଭାରେ ଆଲୋଚନା କରାଯାଇଥିଲା । ଏହି ପରିପ୍ରେକ୍ଷୀରେ ବର୍ତ୍ତମାନ ଲକଡାଉନ ଯୋଗୁଁ ବିଦ୍ୟାଳୟ ବନ୍ଦ ରହିଛି କିନ୍ତୁ ବିଦ୍ୟାଳୟ ଖୋଲାଯିବା ପରେ ପିଲାଟିଏ ଗଛଟିଏ ଯୋଜନାରେ ପ୍ରାୟ ଶହେଟି ବୃକ୍ଷ ଲଗାଇବା ପାଇଁ ସ୍ଥିର କରାଯାଇଥିଲା । ଶେଷରେ ଗଞ୍ଜାମ ଜିଲ୍ଲାପାଳ ବିଜୟ ଅମୃତ କୁଲାଙ୍ଗେଙ୍କ ନିର୍ଦ୍ଦେଶକ୍ରମେ ବ୍ଳକ ଓ ପଞ୍ଚାୟତ ସ୍ତରରେ” ଆମ ସ୍ୱାସ୍ଥ୍ୟ ଆମ ଦାୟୀତ୍ଵ” କାର୍ଯ୍ୟକ୍ରମ ଜରିଆରେ ‘ମିଶନ ଶକ୍ତି ଶାଖା ଓ ସ୍ୱାସ୍ଥ୍ୟ’ ଓ ପରିବାର କଲ୍ୟାଣ ବିଭାଗ ତରଫରୁ ମିଶନ ଶକ୍ତି କୋଭିଡ-୧୯ ସ୍ୱୟଂସିଦ୍ଧା ଗୋଷ୍ଠୀମାନଙ୍କୁ ତାଲିମ ଦେବା ଉଦ୍ଦେଶ୍ୟରେ ଏକ ତାଲିମ ଶିବିର କାର୍ଯ୍ୟକ୍ରମ ଅନୁଷ୍ଠିତ କରାଯାଇଥିଲା । ସମଗ୍ର ବିଶ୍ଵ ଏବେ ମହାମାରୀ କରୋନା ସଂକ୍ରମଣରେ ପିଡୀତ । ଯାହାଫଳରେ ସମସ୍ତ ଜନସାଧାରଣଙ୍କ ମନ ଭିତରେ କୋକୁଆ ଭୟ ଭଳି ପରିସ୍ଥିତି ସୃଷ୍ଟି ହୋଇପାରିଛି ଏଥରୁ ବାଦ ପଡ଼ିନାହାନ୍ତି ରାଜ୍ୟର ସମସ୍ତ ଜିଲ୍ଲାର ଜନସାଧାରଣ । ଏଭଳି ପରିସ୍ଥିତିରେ ରାଜ୍ୟ ସରକାର ରାଜ୍ୟ ବାହାରେ ଫସି ରହିଥିବା ପ୍ରବାସୀମାନଙ୍କୁ ଫେରାଇ ଆଣି ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ସ୍ଥାନୀୟ ପ୍ରଶାସନ ଗଞ୍ଜାମ ଜିଲ୍ଲାର ବିଭିନ୍ନ ସଙ୍ଗରୋଧ କେନ୍ଦ୍ରରେ ରଖିଥିଲେ । ଏହି ପରିପ୍ରେକ୍ଷୀରେ ଅଙ୍ଗନୱାଡ଼ି ଓ ଆଶାକର୍ମୀ ଓ ଡାକ୍ତରଙ୍କ ସମେତ ପ୍ରଶାସନ ଗ୍ରାମ ପରିକ୍ରମା କରି ନିଜ ଜୀବନକୁ ବାଜି ଲଗାଇ ଜଣେ କରୋନା ଯୋଦ୍ଧା ଭାବେ ଲୋକମାନଙ୍କ ପାଖରେ ପହଞ୍ଚି ସଚେତନ କରାଉଛନ୍ତି । ଏହି ଅବସରରେ ଆୟୋଜିତ କାର୍ଯ୍ୟକ୍ରମରେ କରୋନା ସଂକ୍ରମଣ ଭୂତାଣୁ ଠାରୁ ରକ୍ଷା ପାଇବା ଏବଂ ଦୂରେଇ ରହିବା ପାଇଁ ପ୍ରଥମେ ନିଜେ ସଚେତନ ହେବା ସହ ଅନ୍ୟମାନଙ୍କୁ ସଚେତନ କରାଇବା ଏବଂ କରୋନାକୁ ନ ଡରି ସାହାସର ସହ ଲଢେଇ କରିବା ପାଇଁ ଜନସାଧାରଣଙ୍କୁ ତାଲିମ ଦେବା ପାଇଁ ଆଲୋଚନା କରାଯାଇଥିଲା । ଏପରିକି ସଙ୍ଗରୋଧ କେନ୍ଦ୍ର ମାନଙ୍କରେ ଥିବା ପ୍ରବାସୀମାନଙ୍କୁ ସାମାଜିକ ଦୂରତ୍ବ ରକ୍ଷା କରିବା, ମାସ୍କ ବ୍ୟବହାର, ବାରମ୍ବାର ହାତ ସଫା କରିବା, ପରିବେଶ ସଫାସୁତୁରା ରଖିବା ପାଇଁ ଲୋକମାନଙ୍କ ପାଖରେ ପହଞ୍ଚି ସେମାନଙ୍କୁ ସଚେତନ କରାଇବା ପାଇଁ କହିଛନ୍ତି । ଏପରିକି ୧୦ ବର୍ଷରୁ କମ ଓ ୬୦ ବର୍ଷରୁ ଅଧିକ ବୟସର ଲୋକମାନଙ୍କ ଉପରେ ଏହାର ପ୍ରଭାବ ଅଧିକ ରହିବ ବୋଲି ପ୍ରକାଶ କରିଛନ୍ତି । ଏହି ଆୟୋଜିତ ଶିବିରରେ ହାଇସ୍କୁଲ ଶିକ୍ଷୟିତ୍ରୀ, ଅଙ୍ଗନୱାଡ଼ କର୍ମୀ, ଆଶାକର୍ମୀ, ଏସଏସଜି ଗ୍ରୁପ, ସ୍ଵେଚ୍ଛାସେବୀ, ଏଏନଏମ, ସ୍ୱାସ୍ଥ୍ୟ କର୍ମୀ ଅଂଶ ଗ୍ରହଣ କରି ପରିଚାଳନା କରିବାରେ ସହଯୋଗ ପ୍ରଦାନ କରିଥିଲେ ।
ରିପୋର୍ଟ : ଗୋପୀନାଥ ପଟ୍ଟନାୟକ
