ଛତ୍ରପୁର (ସମୃଦ୍ଧ ଓଡିଶା) ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ଆଜି ଜୁମ୍ ଭିଡିଓ କନଫରେନ୍ସିଂ ଜରିଆରେ ଜିଲ୍ଲାର ସମସ୍ତ ଉପଜିଲ୍ଲାପାଳ, ଗୋଷ୍ଠୀ ଉନ୍ନୟନ ଅଧିକାରୀ, ତହସିଲଦାର ଓ ବିଜ୍ଞାପିତ ଅଞ୍ଚଳ ପରିଷଦର କାର୍ଯ୍ୟ ନିର୍ବାହୀ ଅଧିକାରୀମାନଙ୍କ ସହ କୋଭିଡ୍ ପରିଚାଳନା ସମ୍ପର୍କରେ ବିସ୍ତୃତ ଆଲୋଚନା କରିଥିଲେ । ଜିଲ୍ଲାରେ କୋଭିଡ୍ ପରିଚାଳନା ନେଇ ଅର୍ଥର ଅଭାବ ନାହିଁ, ସମସ୍ତେ ଯେପରି ଠିକ୍ ସମୟରେ ସଠିକ୍ ଔଷଧ ପାଇବେ ଏବଂ ସମସ୍ତ କୋଭିଡ୍ ପରିଚାଳନା କେନ୍ଦ୍ର ଗୁଡିକ ଠିକରୂପେ ପରିଚାଳନା ହେବ ସେଥିପ୍ରତି ଦୃଷ୍ଟି ଦେବାକୁ ଜିଲ୍ଲାପାଳ ଅବଗତ କରାଇଥିଲେ । ଲୋକଙ୍କ ଜୀବନ ଅତି ମୂଲ୍ୟବାନ, ତେଣୁ ସେମାନଙ୍କ ଜୀବନ ସୁରକ୍ଷା ଦିଗରେ ସମସ୍ତେ କୋଭିଡ୍ ପରିଚାଳନାକୁ ଗୁରୁତ୍ବ ଦେଇ କାର୍ଯ୍ୟ କରନ୍ତୁ ବୋଲି ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ । ଆଜି ଜିଲ୍ଲା ସ୍ତରରୁ ପର୍ଯ୍ୟବେକ୍ଷକଗଣ କ୍ଷେତ୍ରକୁ ଯାଇ କୋଭିଡ୍ ପରିଚାଳନାଗତ କାର୍ଯ୍ୟ ଯାଞ୍ଚ କରିବେ । ଆସନ୍ତା ଅଗଷ୍ଟ ୧ ତାରିଖ ଠାରୁ ୧୫ ତାରିଖ ପର୍ଯ୍ୟନ୍ତ ସମସ୍ତ ପଞ୍ଚାୟତ ଓ ବିଜ୍ଞାପିତ ଅଞ୍ଚଳ ମାନଙ୍କରେ ସଚେତନତା ଅଟୋରିକ୍ସା ପରିଭ୍ରମଣ କରି ସଚେତନତା ବାର୍ତ୍ତା ପ୍ରଚାର କରିବ । ଜିଲ୍ଲାର ସମସ୍ତ ଆମ୍ବୁଲାନ୍ସର ଅକ୍ସିଜେନ ସ୍ଥିତି ଯାଞ୍ଚ କରି ପୂର୍ବ ପ୍ରସ୍ତୁତ କରି ରଖନ୍ତୁ । ସମସ୍ତ କୋଭିଡ୍ କେୟାର ସେଣ୍ଟର ମାନଙ୍କର ଶତକଡା ୫୦ ପ୍ରତିଶତ ଶଯ୍ୟାରେ ଅକ୍ସିଜେନ୍ ବ୍ୟବସ୍ଥା କରନ୍ତୁ । ସମସ୍ତ କୋଭିଡ୍ ଯୋଦ୍ଧା ମାନଙ୍କର ସ୍ବାସ୍ଥ୍ୟ ସମ୍ବନ୍ଧୀୟ ଖବର ରଖନ୍ତୁ, ସେମାନଙ୍କୁ ମେଡିକାଲ କିଟ୍ ଦିଅନ୍ତୁ । ସେମାନଙ୍କ ସ୍ୱାସ୍ଥ୍ୟବସ୍ଥା ଠିକ୍ ନ ଥିଲେ ତାଙ୍କର ଚିକିତ୍ସା ନିମନ୍ତେ ପଦକ୍ଷେପ ଗ୍ରହଣ କରନ୍ତୁ । ମୃତ୍ୟୁବରଣ କରିଥିବା କୋଭିଡ୍ ଯୋଦ୍ଧା ପରିବାରଙ୍କ କଥା, ସେମାନଙ୍କ ସୁବିଧା ଅସୁବିଧା ସମ୍ପର୍କରେ ଅଧିକାରୀ ନିଜେ ବୁଝନ୍ତୁ । କୋଭିଡ୍ ଯୋଦ୍ଧାଙ୍କ ଆତ୍ମୀୟ ସ୍ୱଜନ ପାଇବାକୁ ଥିବା ସହାୟତା ରାଶି ଓ ମାସିକିଆ ଭତ୍ତା ରାଶି କିପରି ପାଇବେ ତାର ଆବେଦନ ପତ୍ର ସେମାନଙ୍କ ଦ୍ୱାରା ପୂରଣ କରିବାର ପ୍ରକ୍ରିୟା ଦେଖନ୍ତୁ । କୋଭିଡ୍ ସେଣ୍ଟର ଗୁଡିକରେ ତିନି ପ୍ରକାର ନଥିପତ୍ର ପ୍ରଚଳନ କରାଯିବ । ସେଥିରେ ସଠିକ୍ ତଥ୍ୟ ଯେପରି ରହିବ ସେଥିପ୍ରତି ଦୃଷ୍ଚି ଦିଅନ୍ତୁ । ପାରଳା ମହାରାଜା କୋଭିଡ୍ ଚିକିତ୍ସା କେନ୍ଦ୍ରରେ ଅକ୍ସିଜେନ୍ ରହିତ ଅଧିକ ଶଯ୍ୟା ବୃଦ୍ଧି କରାଯିବ । ଜିଲ୍ଲା ରେ ହେଉଥିବା ମୃତ୍ୟୁକୁ କିପରି ରୋକିହେବ ସେହି ଲକ୍ଷ୍ୟ ରଖି କାର୍ଯ୍ୟ କରିବାକୁ ସମସ୍ତଙ୍କୁ ଜଣାଇଥିଲେ । ଲକ୍ଷଣ ଦେଖାଦେବା ପୂର୍ବରୁ ଯଦି ଚିହ୍ନଟ କରିବା ଓ ତଦନୁଯାୟୀ ତାର ପରୀକ୍ଷା କରି ଚିକିତ୍ସା କରିବା ତେବେ ମୃତ୍ୟୁକୁ ରୋକିପାରିବା । ଅଧିକ ସଂଖ୍ୟକ ସଂକ୍ରମିତ ବ୍ୟକ୍ତି ଚିହ୍ନଟ ହୁଅନ୍ତୁ ଏଥିରେ ଚିନ୍ତା କରିବାର ଆବଶ୍ୟକତା ନାହିଁ, ଗୁରୁତର ଅବସ୍ଥାକୁ ଆସିବା ପୂର୍ବରୁ ସେମାନେ ଚିହ୍ନଟ ହୋଇ ଚିକିତ୍ସିତ ହୋଇ ସୁସ୍ଥ ହୋଇପାରିବେ । କୋଭିଡ୍ କେୟାର ସେଣ୍ଟର ଗୁଡିକରେ ପୁରୁଷ ଓ ମହିଳା ମାନଙ୍କ ପାଇଁ କରାଯାଇଥିବା ସ୍ୱତନ୍ତ୍ର ସ୍ଥାନ ଗୁଡିକର ପରିଚାଳନା ଦାୟୀତ୍ବ ସଠିକ କରନ୍ତୁ । ଓ୍ବାଲ୍ ପେଣ୍ଟଂ, ଓ୍ବାଲ ରାଇଟିଂ କରି ସଚେତନତା ବାର୍ତ୍ତାକୁ ବ୍ୟାପକ କରନ୍ତୁ । ତହସିଲଦାର ଓ ଥାନା ଅଧିକାରୀ ଗଣ ସାମାଜିକ ଦୂରତ୍ବ ବଜାୟ ରଖିବା ଦିଗରେ ଚଢାଉ କରନ୍ତୁ । ସୁପର ସ୍ପ୍ରେଡର୍ ମାନଙ୍କୁ ଚିହ୍ନଟ କରି ତାଙ୍କୁ କ୍ବାରେନଣ୍ଟାଇନ୍ ସେଣ୍ଟରରେ ରଖନ୍ତୁ । ମନ୍ଦିର, କୋଠଘର କିମ୍ବା ଗଛତଳେ ଥିବା ପିଣ୍ଡିରେ ବସି ଗପସପ କରୁଥିବା କିମ୍ବା ତାସ୍ ଖେଳୁଥିବା ବ୍ୟକ୍ତିଙ୍କୁ ଧରି ସେମାନଙ୍କ ବିରୁଦ୍ଧରେ ଏତେଲା ଦାୟର କରନ୍ତୁ । ୧୦ ରୁ ୧୨ ଜଣ ବ୍ୟକ୍ତିଙ୍କୁ ନେଇ ଅଟୋରିକ୍ସା ଗୁଡିକ ଚାଲୁଥିବା ନଜରକୁ ଆସୁଛି । ସେଗୁଡିକୁ ଚଢାଉ କରାଯାଉ ଏବଂ ଆଞ୍ଚଲିକ ପରିବହନ ଅଧିକାରୀ ସେ ଦିଗରେ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ ବୋଲି ଜିଲ୍ଲାପାଳ ଜଣାଇଥିଲେ । ନରେଗାରେ ଗ୍ରାମାଞ୍ଚଳ ଲୋକେ ତାଙ୍କ ଗ୍ରାମରେ ଯେପରି କାମ ପାଇବେ ସେଥିପ୍ରତି ଦୃଷ୍ଟି ଦିଅନ୍ତୁ । ଗ୍ରାମାଞ୍ଚଳ ଲୋକେ କାମ ପାଇଁ ଯେମିତି ସହରକୁ ଆସିବେ ନାହିଁ ତାହା ସୁନିଶ୍ଚିତ କରନ୍ତୁ । ସ୍ୱାବ ଟେଷ୍ଟ କାର୍ଯ୍ୟକୁ ଅଧିକ ଗୁରୁତ୍ବ ଦିଅନ୍ତୁ । ଆଗାମୀ ଦିନେ ଦୁଇଦିନ ମଧ୍ୟରେ ସ୍ୱତନ୍ତ୍ର ଉତ୍ସର୍ଗୀକୃତ କୋଭିଡ୍ କେୟାର ସେଣ୍ଟର ମହାରାଜା କୃଷ୍ଣଚନ୍ଦ୍ର ଗଜପତି ଭେଷଜ ମହାବିଦ୍ୟାଳୟ ଓ ଅଶ୍ବିନ ଦ୍ବାରା କରାଯାଉଛି । ଏହି ଦୁଇଟି ହେବା ପରେ କ୍ରିଟିକାଲ୍ କେସ୍ ଜନୀତ ରୋଗର ଚିକିତ୍ସା ସମ୍ଭବ ହୋଇପାରିବ ଓ ଜିଲ୍ଲାବାସୀ ଉପକୃତ ହୋଇପାରିବେ । ଖୋଲାଯାଉଥିବା ଦୋକାନ ଗୁଡିକ ୫ ସୂତ୍ର ପାଳନ କରୁଛନ୍ତି ନା ନାହିଁ ତାହା ତଦାରଖ କରି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ । ଜୁମ୍ ଭିଡିଓ କନଫରେନ୍ସିଂରେ ଜିଲ୍ଲା ସ୍ତରୀୟ ଅଧିକାରୀଙ୍କ ଠାରୁ ଆରମ୍ଭ କରି ପଞ୍ଚାୟତ ସ୍ତର ପର୍ଯ୍ୟନ୍ତ ସମସ୍ତ ସଂପୃକ୍ତ ଅଧିକାରୀ ଗଣ ଅଂଶ ଗ୍ରହଣ କରିଥିଲେ ବୋଲି ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ଜଣାଇଛନ୍ତି ।
ରିପୋର୍ଟ : ଜିଲ୍ଲା ପ୍ରତିନିଧି ନିମାଇଁ ଚରଣ ପଣ୍ଡା
