ଛତ୍ରପୁର (ସମୃଦ୍ଧ ଓଡିଶା) ସ୍ଥାନୀୟ ରିକାପଲ୍ଲୀ କସ୍ତୁରବା ଆବାସିକ ବିଦ୍ୟାଳୟ ପରିସରରେ ଛତ୍ରପୁର ବ୍ଲକସ୍ତରୀୟ ବିଶ୍ୱ ଦିବ୍ୟାଙ୍ଗ ଦିବସ ପାଳିତ ହୋଇଯାଇଛି । ଏହା ଛତ୍ରପୁର ବିଇଓ କାର୍ଯ୍ୟାଳୟ ଓ ସର୍ବଶିକ୍ଷା ଅଭିଯାନର ମିଳିତ ଆନୁକୂଲ୍ୟରେ ଛତ୍ରପୁର ବ୍ଲକ ଶିକ୍ଷାଧିକାରୀ ଅବିନାଶ ଶତପଥୀଙ୍କ ପ୍ରତ୍ୟକ୍ଷ ତତ୍ୱାବଧାନରେ ଅନୁଷ୍ଠିତ ହୋଇଯାଇଛି । ଏଥିରେ ଡିପିଏମ୍ ସୁବ୍ରତ କୁମାର ବେରିହା, ବିଏସଏସଓ ରାଜେନ୍ଦ୍ର କୁମାର ମଲ୍ଲିକ ଅତିଥି ଭାବେ ଯୋଗଦେଇ ଉତ୍ସବକୁ ଉଦଘାଟନ କରିବା ସହ ପ୍ରୟାସ ନାମକ ଏକ ପତ୍ରିକାର ଉନ୍ମୋଚନ କରି ବାଣିଶ୍ରୀ ଭତା ବଣ୍ଟନ କରିଥିଲେ । ଏହି ସମାରୋହରେ ସମ୍ମାନୀତ ଅତିଥି ଭାବେ ଏବିଇଓ ନୃସିଂହ ଚରଣ ମିଶ୍ର ଯୋଗ ଦେଇ ଦିବ୍ୟାଙ୍ଗମାନଙ୍କ ସମସ୍ୟା ଉପରେ ଆଲୋକପାତ କରିଥିଲେ । ଏହାପରେ ୨୦୦ ଦିବ୍ୟାଙ୍ଗଙ୍କ ଏକ ରାଲି ବାହାରି ସହର ପରିକ୍ରମା କରିଥିଲେ । ଏହି ଅବସରେ ଦିବ୍ୟାଙ୍ଗମାନଙ୍କ ମଧ୍ୟରେ ବିଭିନ୍ନ ପ୍ରତିଯୋଗିତା ଏବଂ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଅପରାହ୍ନରେ ଅନୁଷ୍ଠିତ ଉଦଯାପନୀ ଉତ୍ସବରେ ଉପରୋକ୍ତ ଅତିଥୀ ମାନେଯୋଗ ଦେଇ କୃତୀ ପ୍ରତିଯୋଗୀଙ୍କୁ ପୁରସ୍କାର ବିତରଣ କରିଥିଲେ । ବ୍ଲକ ସ୍ତରୀୟ ସମାବେଶକୁ ବ୍ଲକ ସମ୍ବଳ ଶିକ୍ଷକ ଅଶ୍ୱିନୀ ପାଇକରାୟ ଓ ଦୀପାଞ୍ଜଳି ମହାନ୍ତି ପରିଚାଳନା କରିଥିବା ବେଳେ ଅର୍ନ୍ତନିବେଶୀ ଶିକ୍ଷା ସ୍ୱେଚ୍ଛାସେବୀ ପ୍ରଦୀପ ପ୍ରଧାନ, ସ୍ୱପ୍ନା ମୁଦୁଲି, ଅଶୋକ ପଲାଇ, ପଦ୍ମନାଭ ବେହେରାଙ୍କ ସମେତ ସମସ୍ତ ସିଆରସିସି ଏବଂ ବ୍ଲକ କର୍ମଚାରୀମାନେ ପରିଚାଳନାରେ ସହଯୋଗ କରିଥିଲେ ।
ରିପୋର୍ଟ : ନିମାଇଁ ଚରଣ ପଣ୍ଡା