ଜଳେଶ୍ୱର (ସମୃଦ୍ଧ ଓଡିଶା) ଲକ୍ଷ୍ମଣନାଥ ରୋଡ ସ୍ଥିତ ୟୁନିଫାଏଡ ତନଖି ଫାଟକ ଉଚ୍ଛେଦ ହେବା ପରେ ଏବେ କେତେକ ଅସାମାଜିକ ଯୁବକ ୬୦ନଂ ଜାତୀୟ ରାଜପଥର କେତେକ ସ୍ଥାନରେ ଗୋଷ୍ଠୀଗତ ଭାବେ ବ୍ୟାପକ ଚାନ୍ଦା ଆଦାୟ କରୁଛନ୍ତି । ଏ ସଂପର୍କରେ ଜଣାଯିବାପରେ ମଧ୍ୟ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ କରିବା ଯୋଗୁଁ ଅସନ୍ତୋଷ ବୃଦ୍ଧି ପାଉଛି । ଗତ ୩ ଦିନ ତଳେ ଏକ ମାଛ ବୋଝେଇ ପିକ୍ଅପରୁ ଚାନ୍ଦା ମାଗି ବିଫଳ ହେବାରୁ ବ୍ୟାପକ ଲୁଟ୍ କରାଯାଇଥିବାର ଏକ ଅଭିଯୋଗ ଥାନାରେ ହେବା ଓ ଏଥିରେ ସଂପୃକ୍ତ ଦୁଇଟି ଗାଡିକୁ ପୁଲିସ୍ ଜବତ୍ କରିଥିଲେ ମଧ୍ୟ ଅଭିଯୁକ୍ତ ମାନଙ୍କୁ ଗିରଫ କରାଯାଉନଥିବାରୁ ସ୍ଥାନୀୟ ଜଳେଶ୍ୱର ସଚେତନ ନାଗରିକମାନଙ୍କ ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ପୋଲିସକୁ ଦାୟୀ କରାଯାଇଛି । ୬୦ ନଂଜ ଜାତୀୟ ରାଜପଥରୁ ୟୁନିଫାଏଡ ଗେଟ୍ ଉଚ୍ଛେଦ ହୋଇଥିଲେ ମଧ୍ୟ ଏବେବି ତନଖି ଫାଟକ ନାମରେ ବ୍ୟାପକ ଚାନ୍ଦ ଆଦାୟ ଓ ଲୁଟ ତରାଜ ହୋଇ ଆସୁଛି । ବିଭିନ୍ନ ସମୟରେ ସ୍ଥାନୀୟ କେତେକ ଅସଭାଜିକ ଯୁବକ ସଂଘବଦ୍ଧଭାବେ ଆନ୍ତରାଜ୍ୟ ଟ୍ରକ ଗୁଡିକରୁ ବ୍ୟାପକ ଚାନ୍ଦା ଆଦାୟ କରୁଛନ୍ତି । ଆନ୍ତରାଜ୍ୟରେ ଚଳାଚଳ କରୁଥିବା ପ୍ରାୟ ୮୦ଟି ବସ୍ ବ୍ୟାପକ ମାଲ ପରିବହନ କରି ଟ୍ୟାକ୍ସ ଫାଙ୍କି ଚାଲିଥିବା ହେତୁ ଏହାର ସୁଯୋଗ ନେଇ ଯୁବକମାନେ ଚାନ୍ଦା ଓ ରାହାଜାନୀ ଇତ୍ୟା କରିଆସୁଛନ୍ତି । ଅତୀତରେ ଏପରି କେତେକ ଅଭିଯୋଗ ମଧ୍ୟ ଥାନାରେ କରାଯାଇଛି । ପ୍ରକାଶଯୋଗ୍ୟ ନିକଟରେ ପୁଲିସ୍ର ପେଟ୍ରୋଲିଂ ଚାଲିଥିବା ବେଳେ ଏପରି କାର୍ଯ୍ୟକୁ ପ୍ରତିହତ କରାଯାଉନଥିବାରୁ ପୁଲିସ୍ର କାର୍ଯ୍ୟକଳାପକୁ ଅଙ୍ଗୁଳି ନିର୍ଦ୍ଦେଶ କରୁଛି । ଗତ ୯ ତାରିଖ ରାତିରେ ଏକ ପିକ୍ଅପ୍ ଓଡି୦୧ଟି୧୭୫୧ ମାଛଧରି କେନ୍ଦ୍ରପଡାରୁ କୋଲକତା ଅଭିମୁଖେ ଗଲାବେଳେ ୬୦ନଂ ଜାତୀୟ ରାଜପଥର ଗାୟତ୍ରୀ ପେଟୋଲ ପମ୍ପ ନିକଟରେ ଗାଡିକୁ ଅଟକାଇଥିଲେ । କିନ୍ତୁ ଗାଡିଟି ନ ଅଟକିବାରୁ ଚାନ୍ଦା ଆଦାୟକାରୀ ବ୍ୟକ୍ତିମାନେ ଏକ ଓଡି୦୧ଏବି୧୭୬୯ ବୋଲେର ଗାଡିରେ ଗୋଡେଇ ମାଛଗାଡିକୁ ଅଟକାଇଥିଲେ । ସେଠାରେ ଚାନ୍ଦା ମାଗି ବିଫଳ ହେବା ପରେ ପିକ୍ଅପରେ ଥିବା ଚିଙ୍ଗୁଡିମାଛ ଛିନ୍ତାଇ କରିଥିଲେ । ଗାଡିରେ ଥିବା ମୋବାଇଲ୍ ଓ ୩ହଜାର ଟଙ୍କା ନେଇଯାଇଥିବା ପିକ୍ଅପ୍ର ଡ୍ରାଇଭର ରାଧାକୃଷ୍ଣ ସାମନ୍ତ ଥାନାରେ ଲିଖିତ ଅଭିଯୋଗ କରିଛନ୍ତି । ଏହି ଅଭିଯୋଗରେ ଜଳେଶ୍ୱର ପୂର୍ବତନ ବିଧାୟକଙ୍କ ପୁଅଙ୍କ ନେତୃତ୍ୱରେ ଏ ଅଂଚଳର ୧୬ଜଣ ଯୁବକ ଏପରି ଘଟଣା ଭିଆଇଥିବାରୁ ଡ୍ରାଇଭର ତାଙ୍କ ଲିଖିତ ବିବରଈରେ ପ୍ରକାଶ କରିଛନ୍ତି । ଏହି ଘଟଣାରେ ପୁଲିସ୍ ୨ଟି ଗାଡିକୁ ଥାନାରେ ଅଟକ ରଖିଥିବା ବେଳେ କୌଣସି ଅଭିଯୋଗକୁ ଗିରଫ କରୁନଥିବାରୁ ଆଜି ଜଳେଶ୍ୱର ସଚେତନ ନାଗରିକ ପକ୍ଷରୁ ଏକ ସାମ୍ବାଦିକ ସମ୍ମିଳନୀ ସ୍ଥାନୀୟ ଡାକବଂଗଳାରେ ଅହୁତ ହୋଇଥିଲା । ଏକ ନିର୍ଦ୍ଦିଷ୍ଟ ରାଜନୈତିକ ଦଳର ଯୁବକମାନେ ଏପରି ଛିନ୍ତାଇ ଓ ଚୋରୀ କାର୍ଯ୍ୟ କରୁଥିବା ସଂପର୍କରେ ଚନ୍ଦନ କୁମାର କର, ମୀର ଆବସ ଅଲ୍ଲି, ରଂଜିତ୍ ପାତ୍ର, ଚନ୍ଦ୍ରକାନ୍ତ ଖଟୁଆ, ସେକ୍ ହାସିରୁଦ୍ଦିନ ବକ୍ସ, ମାନସ ରଂଜନ ଧଳ ପ୍ରମୁଖ ଆଜିର ସାମ୍ବାଦିକ ସମ୍ମିଳନୀରେ ଅଭିଯୋଗ କରିଛନ୍ତି । ଜଣେ ପ୍ରାକ୍ତନ ବିଧାୟକଙ୍କ ପୁଅ ଏହି ଘଟଣାରେ ସଂପୃକ୍ତ ଥିବାରୁ ପୁଲିସ୍ ଜାଣିଶୁଣି ଗିରଫ କରୁନଥିବାର ସେମାନେ ଅଭିଯୋଗ କରିଛନ୍ତି । ଏ ସଂପର୍କରେ ଜଳେଶ୍ୱର ପୋଲିସଙ୍କ ସହିତ ଯୋଗାଯୋଗ କରିବାରୁ ଏହା କେସ୍ ରେଜିଷ୍ଟାର ହୋଇ ସାରିଛି । ଖୁବଶୀଘ୍ର ଅଭିଯୁକ୍ତଙ୍କୁ ଧରିବା ଲାଗି ପ୍ରୟାସ ଆରମ୍ଭ ହୋଇଥିବା କହିଥିଲେ ।
ରିପୋର୍ଟ : ଭୂପତି କୁମାର ପରିଡା
